आमदार व्हत्येती, पैसं कमवत्येती अन् जात्याती..! ऊसतोड मजूर महिलेनं पुढाऱ्यांना धू धू धुतलं, Video

खूप शिकूनही आपल्या मुलाला परमनंट नोकरी नसल्याचं दुःख निंब्यावा वालेकर यांनी व्यक्त केलं. सुशिक्षित मुलांनाही आपल्यासारखंच ऊस तोडीचे काम करून जगावं लागत असल्याचेही त्यांनी सांगितले. ‘पाणी, पाणी’ म्हणून कित्येक पिढ्या गेल्या. पण आजपर्यंत कुठल्याही राजकीय नेत्यांना कर्नाटक सीमाभागात असणाऱ्या आमच्या गावाला पाणी दिले नाही. फक्त मतदानापुरतेच सगळ्या साहेबांना आम्ही दिसतो. मतदानाचा दिवस झाला की आमच्याकडे कोणीही लक्ष देत नसल्याचे दुःख त्यांनी लोकल18 सोबत बोलताना व्यक्त केले. पोट भरण्यासाठी गाव सोडून आम्ही दूर आलोय. साहेबांना आमदार करून मुंबईला पाठवण्यासाठी का मतदान करावं ? आपल्या प्रश्नांकडे कधीच न पाहणाऱ्या राजकीय पुढार्‍यांना मतदान करण्यासाठी स्वत:च्या खर्चाने गावाकडे जाण्याची इच्छा नसल्याचे वालेकर कुटुंबाने सांगितले.

लोकल 18च्या प्रतिनिधींशी संवाद साधलेले हे वालेकर कुटुंब मूळचे सांगलीच्या जत तालुक्यातले आहेत. कर्नाटक सीमाभागात असणाऱ्या बहुचर्चित जत मतदारसंघाचे पाण्याविना तळमळणारे हेच ते मतदार आहेत. ऊसतोड कामगारांची हजारो मते बुडू नयेत, यासाठी त्यांना गावाकडे ने-आण करण्याचा खटाटोप करणारे राजकीय उमेदवार आपण या आधीच्या निवडणुकांमध्येही पाहिले आहेत. परंतु, त्यांच्या जगण्याचा मूळ प्रश्न सोडवणाऱ्या लोकप्रतिनिधींचा इकडे पाण्यासारखाच दुष्काळ दिसतो आहे. या स्थलांतरित मजुरांच्या समस्यांची चिंता नसणाऱ्या पुढार्‍यांना त्यांच्या मतदानाची किती चिंता आहे? आणि मतदार संघाबाहेर स्थलांतरित झालेल्या मतदारांच्या मतदानाचा टक्का वाढवण्यासाठी कार्यकर्ते किती झटतील? यावरच विदर्भ, मराठवाड्यासह माणदेशातील निवडणुकांचे निकाल ठरणार आहेत.