पुण्यात 19 वर्षीय तरुणाने संपवलं जीवन, जाता जाता मृत्यूचं सिक्रेट सोबतच घेऊन गेला, काय घडलं?

अर्थव विजय देशमुख असं आत्महत्या करणाऱ्या १९ वर्षीय तरुणाचं नाव आहे. तो पिंपरी चिंचवडच्या दिघी येथील गंगोत्री हॉस्पिटल जवळ पार्वती भोजने यांच्या घरात कुटुंबासोबत भाड्याने राहत होता. रविवारी रात्री साडेसात वाजण्याच्या सुमारास त्याने राहत्या घरात सीट बेल्टच्या सहाय्याने गळफास घेतला. ही घटना तेव्हा घडली, जेव्हा घराचा दरवाजा आतून बंद होता. तसेच त्याचा मोबाईल देखील फॉरमॅट केला होता. त्यामुळे त्याने आत्महत्या नेमकी कोणत्या कारणामुळे केली? याचं गूढ निर्माण झालं आहे. तो आपल्या मृत्यूचं सिक्रेट सोबतच घेऊन गेला.

ही घटना जेव्हा घडली, तेव्हा अथर्वची आई घरी नव्हती. ती घरी आली असता तिने दरवाजा ठोठावला. पण आतून काहीच प्रतिसाद मिळाला नाही. अथर्वने प्रतिसाद न दिल्याने त्याची आई ज्योती देशमुख आणि शेजाऱ्यांनी खिडकीतून घराची कडी उघडून आत प्रवेश केला. त्याला तातडीने खाली उतरवून जवळच्या गंगोत्री हॉस्पिटलमध्ये नेण्यात आले. तिथून पुढील उपचारासाठी त्याला पिंपरी येथील वाय.सी.एम. रुग्णालयात हलवण्यात आले. तिथे डॉक्टरांनी त्याला तपासून मृत घोषित केले.

पोलिसांनी या घटनेचा पंचनामा केला असून मृतदेहाचे शवविच्छेदन करण्यात आले आहे. अथर्वच्या आत्महत्येचे नेमके कारण अद्याप समजू शकलेले नाही. मात्र त्याने आत्महत्या पूर्वी आपला मोबाईल फोन हा फॉरमॅट केल्याने त्याच्या मृत्यूचं गूढ निर्माण झालं आहे. या घटनेचा अधिक तपास दिघी पोलीस अधिक तपास करत आहेत.