पुणे हादरलं! मैत्रिणीकडे बघून गाणं गायल्याने तरुणावर जीवघेणा हल्ला, चाकूने केले सपासप वार

मिळालेल्या माहितीनुसार, फिर्यादी तरुण प्रिन्स शैलेंद्र सिंग (वय २६, रा. भैरवनाथनगर, कोंढवे धावडे) हा ५ फेब्रुवारी रोजी रात्री दहाच्या सुमारास उत्तमनगरमधील कोंढवा गेट परिसरात थांबला होता. त्याच वेळी मुख्य आरोपी करण वाशिलकर हा देखील तिथे उपस्थित होता. प्रिन्सने आपल्या मैत्रिणीकडे पाहून गाणे गायले, असा वाशिलकर याचा गैरसमज झाला. याच कारणावरून दोघांमध्ये बाचाबाची सुरू झाली.

हा वाद इतका विकोपाला गेला की, वाशिलकरने त्याच्या इतर चार साथीदारांना बोलावून घेतले. आरोपींनी सुरुवातीला प्रिन्सला अश्लील भाषेत शिवीगाळ केली आणि त्यानंतर काही समजण्यापूर्वीच त्यांच्याकडील तीक्ष्ण शस्त्राने त्याच्यावर सपासप वार केले. या भीषण हल्ल्यात प्रिन्स गंभीर जखमी झाला असून, रक्ताच्या थारोळ्यात पडलेल्या प्रिन्सला सोडून आरोपी घटनास्थळावरून पसार झाले होते.

या जीवघेण्या हल्ल्यानंतर जखमी प्रिन्स सिंग याने उत्तमनगर पोलीस ठाण्यात फिर्याद दिली. घटनेचे गांभीर्य ओळखून पोलिसांनी तातडीने तपासचक्र फिरवले आणि तांत्रिक माहितीच्या आधारे पाचही आरोपींना बेड्या ठोकल्या. करण गणपत वाशिलकर (वय ३४), रोहित उर्फ ओजी गणेश मौर्य (वय २४), गणेश सिद्धराम कालदीप (वय २०), आदित्य गणेश पवार आणि बबलू शिवाजी कांबळे (वय २२) असं अटक केलेल्या आरोपींची नावं आहेत. हे सर्व आरोपी उत्तमनगर परिसरातीलच रहिवासी आहेत. किरकोळ कारणावरून झालेल्या या खुनाच्या प्रयत्नामुळे परिसरात घबराटीचे वातावरण आहे. या घटनेचा अधिक तपास केला जात आहे.