चार पैशासाठी जीव घेतला! धारदार हत्याराने चिरला गळा, पिंपरीतील खळबळजनक घटना

मृत व्यक्तीचे नाव दीपक कुमार प्रजापती (वय ४०, रा. शांतीनगर, भोसरी) असे आहे. दीपक हे आपल्या पत्नी आणि तीन मुलांसह शांतीनगर भागात वास्तव्यास होते. पोलिसांनी दिलेल्या माहितीनुसार, दीपक यांनी आरोपी विष्णू प्रजापती (२६, रा. प्रयागराज, उत्तर प्रदेश) याच्याकडून काही पैसे उसने घेतले होते. हे पैसे परत करण्यावरून दोघांमध्ये गेल्या काही दिवसांपासून खटके उडत होते.

सोमवारी सकाळी दीपक यांचा मृतदेह बैलगाडा घाट परिसरात रक्ताच्या थारोळ्यात आढळून आला. आरोपीने अत्यंत क्रूरपणे धारदार हत्याराने त्यांचा गळा चिरला होता. घटनेची माहिती मिळताच भोसरी पोलिसांनी घटनास्थळी धाव घेतली. तपासादरम्यान संशयाची सुई विष्णू प्रजापतीकडे वळली. मात्र, गुन्हा केल्यानंतर तो पसार झाला होता. तांत्रिक तपासाच्या आधारे पोलिसांनी त्याचा माग काढला आणि त्याला मुंबईतून अटक केली.