Trending:

Pimpri News : अपुऱ्या बससेवेमुळे विद्यार्थ्यांसह नागरिकांचा जीवघेणा प्रवास; महापालिका लक्ष देणार का?

Published by:Tanvi
local18

Last Updated:September 27, 2025 10:27 AM IST

Pmp Bus Shortage In Charholi : चऱ्होली परिसरातील अपुऱ्या बससेवेमुळे विद्यार्थ्यांसह नागरिकांना दररोज जीवघेणा प्रवास करावा लागत आहे. या गंभीर समस्येकडे महापालिकेचे लक्ष वेधले जाईल की नाही हे पाहणे महत्वाचे ठरेल.

इम्पॅक्ट शॉटतुमचा गेटवे लेटेस्ट न्यूज

पिंपरी : पिंपरीतील चऱ्होली परिसरात पीएमपी बसची संख्या कमी असून प्रवाशांची संख्या जास्त आहे. त्यामुळे रोज प्रवास करणाऱ्यांना मोठा त्रास सहन करावा लागतो. या परिस्थितीचा सर्वाधिक परिणाम गच्च भरलेल्या बसमध्ये प्रवास करणाऱ्या विद्यार्थ्यांवर होतो. बससाठी ताटकळत उभे राहावे आणि नंतर गर्दीत लटकत प्रवास करावा लागतो ही वास्तव परिस्थिती आहे.

चऱ्होली परिसरात अनेक शाळा आणि महाविद्यालये असल्यामुळे येथे प्रवास करणाऱ्या विद्यार्थ्यांची संख्या खूप आहे. परंतु, बसची संख्या आणि वारंवारिता त्याच्या तुलनेत खूप कमी आहे. परिणामी प्रवाशांना बससाठी दीर्घकाळ थांबावे लागते आणि नंतरही त्यांना बसमध्ये जागा न मिळाल्यामुळे उभे राहून लटकावे लागते.

आळंदी बसस्थानकातून सकाळी 9 वाजता आणि 11 वाजता निघालेल्या पीएमपी बसमध्ये विद्यार्थी, विद्यार्थिनी तसेच इतर प्रवाशांची संख्या खूप जास्त असते. सायंकाळीही गर्दी अधिक असते आणि बस प्रत्येक थांब्यावर थांबते त्यामुळे चढणाऱ्या आणि उतरणाऱ्या प्रवाशांची संख्या जास्त असल्यामुळे बसमध्ये जागा मिळणे कठीण होते.

विद्यार्थ्यांना लटकत प्रवास करावा लागल्यामुळे अनेकदा जीवनासाठी धोका निर्माण होतो. काही वेळा बसमध्ये खूप गर्दीमुळे विद्यार्थी कोसळून जखमीही होतात. प्रवाशांनी सांगितले की ही परिस्थिती रोजच्या प्रवासात सतत अनुभवावी लागते आणि त्यामुळे विद्यार्थ्यांचे शारीरिक आणि मानसिक स्वास्थ्य दोन्ही प्रभावित होते.

चऱ्होली परिसरातून आळंदी बसस्थानकाची पीएमपी बस देहू फाटा, काटे वस्ती, चन्होली फाटा, आझादनगर, दाभाडे वस्ती, चन्होली गाव, भोसले वस्ती आणि पठारे मळ्यापर्यंत जाते. या मार्गावर प्रवास करणाऱ्यांची संख्या खूप आहे, त्यामुळे बस नेहमीच भरलेली असते.

विद्यार्थी आणि पालक या समस्येवर बसची संख्या आणि वारंवारिता वाढवण्याची मागणी करत आहेत. त्यांनी म्हटले आहे की, बस जास्त आणि नियमित असेल तर प्रवाशांना सुरक्षित आणि आरामदायक प्रवास करता येईल. त्यामुळे प्रशासनाने चन्होलीसारख्या शैक्षणिक आणि रहिवासी क्षेत्रांमध्ये बस सेवा सुधारण्यावर तातडीने लक्ष देणे आवश्यक आहे.