जेजुरीच्या खंडोबाचं दर्शन घेऊन घरी निघाले, पण रात्री सव्वाबारा वाजता दिवेघाटात भयंकर घडलं, बाप-लेकीचा मृत्यू

सुंदर कैलास गंगावणे (वय ३३) हे आपली मुलगी अनन्या (वय १२) आणि मुलगा सोहम (वय ८) यांच्यासह जेजुरीला दर्शनासाठी गेले होते. दर्शन घेऊन परतत असताना मध्यरात्री सव्वा बाराच्या सुमारास दिवे घाटातील देवाची उरुळी परिसरात पाठीमागून येणाऱ्या एका ट्रकने त्यांच्या दुचाकीला जोराची धडक दिली. धडक इतकी भीषण होती की अनन्या ट्रकच्या चाकाखाली सापडली आणि तिचा जागीच मृत्यू झाला. सुंदर गंगावणे यांना गंभीर अवस्थेत रुग्णालयात हलवण्यात आले, मात्र तिथे उपचारादरम्यान त्यांचाही मृत्यू झाला.

याप्रकरणी फुरसुंगी पोलिसांनी तातडीने कारवाई करत ट्रक चालक हनुमंत बाबूराव मलकापुरे (वय ३२, रा. लातूर) याला अटक केली आहे. अश्विनी उत्तम पवार यांनी दिलेल्या फिर्यादीनुसार, पोलिसांनी चालकावर गुन्हा दाखल केला आहे. पोलीस उपनिरीक्षक देशमुख या प्रकरणाचा अधिक तपास करत असून, घाटातील वेगमर्यादा आणि चालकाचा निष्काळजीपणा यावर तपास केंद्रित केला आहे.