Deep Amavasya 2024 : श्रावण महिन्याच्या आधी दीप अमावस्या, घरात येणार सुख आणि शांती; जाणून घ्या, पूजेचा शुभ मुहूर्त आणि महत्त्व

पुणे : आषाढी अमावस्या किंवा दीप अमावस्या ही आषाढ महिन्यातील अखेरीस येणाऱ्या अमावस्येला म्हटले जाते. आषाढ अमावस्या ही चातुर्मासातील पहिली अमावस्या मानली जाते. श्रावण महिन्याला सुरुवात होण्याच्या आदल्या दिवशी ही अमावस्या येते. या अमावास्येच्या दीपपूजनाला अधिक महत्व प्राप्त झाले आहे. ते भाग्यकारक मानले गेले आहे. या दिवशी स्नान, दान आणि पूजाविधीचे वेगळे महत्त्व आहे. महाराष्ट्रात या अमावस्येला गटारी अमावस्या म्हणूनही ओळखले जाते.

यावर्षी आषाढ अमावस्या 4 ऑगस्ट रोजी साजरी केली जाणार आहे. यालाच दीप अमावस्या किंवा दिव्यांची पहाट, असे म्हणतात. या दिवशी घरात दिवे लावले जातात आणि रांगोळी काढून पूजा केली जाते. या पूजेत पिठाचा दिवा लावला जातो.आपल्याकडे महाराष्ट्रात दक्षिण भारतीय पंचांगानुसार 5 ऑगस्ट 2024 ला श्रावण मासारंभ होणार आहे. श्रावण महिन्यातील शुक्ल पक्षातील प्रतिपदा तिथीपासून हा श्रावण महिना सुरू होणार आहे. यंदा महाराष्ट्रात हा श्रावण महिना 5 ऑगस्टपासून म्हणजे येत्या सोमवारपासून सुरू होणार आहे. यावेळी 5 श्रावणी सोमवार येणार आहेत.