आता तुम्ही घरीच थांबा! पुण्यातील लहानग्यांना अंगणवाडीत कोंडणाऱ्या दोघींवर कारवाई

आयटीनगरी हिंजवडी परिसरात हा धक्कादायक प्रकार घडला होता. यात 20 लहानग्यांना अंगणवाडीत कोंडून ठेवल्याचा प्रताप समोर आला. हिंजवडीत वीस लहानग्यांना अंगवाडीत कोंडून अंगणवाडी सेविका आणि मदतनीस बैठकीला गेल्याची संतापजनक घटना समोर आली होती. या घटनेचा व्हिडीओही समोर आला. हे पाहून पालकांनी चांगलाच संताप व्यक्त केला. हिंजवडीतील अंगणवाडी क्रमांक 3 मधील सेविका सविता शिंदे आणि मदतनीस शिल्पा साखरे यांनी हा प्रताप केला. ग्रामपंचायतीत एका माजी सरपंचाने बैठकीला बोलावलं म्हणून आम्ही मुलांना आत ठेवून अंगवाडीला कुलूप लावलं, असा खुलासा या दोघींनी केला. यादरम्यान बराच वेळ आत कोंडलेली लहान मुलं मोठमोठ्याने हंबरडा फोडून रडत होती. बुधवारी सकाळी 11 ते 12 च्या दरम्यान हा धक्कादायक प्रकार घडला.