रिक्षात विसरली दागिन्यांची बॅग; महिला ढसाढसा रडायला लागली, शेवटी पोलिसांनी शोधलीच, पण कशी?

झालं असं की, हर्षा गिरासे नामक महिला शनिवारी सकाळी आपल्या बहिणीच्या घरून (सुरत) खासगी ट्रॅव्हल्सने नांदेड सिटी येथील घरी परतत होत्या. देहूरोड बायपास मार्गे वारजे येथे उतरण्याऐवजी त्या चुकून नवले ब्रिज येथे उतरल्या. लहान मूल सोबत असल्याने घाईगडबडीत नवले ब्रिजवरून वारजे येथे येण्यासाठी त्यांनी रिक्षा पकडली. मात्र, घरी पोहोचल्यावर त्यांच्या लक्षात आलं की, सोन्याचे दागिने आणि दस्तऐवज असलेली त्यांची महत्त्वाची बॅग रिक्षातच विसरली आहे. रिक्षाचा नंबर माहीत नसल्याने आणि बहिणीने विश्वासाने दिलेले दागिने गमावल्यामुळे होणाऱ्या परिणामाच्या भीतीने हर्षा गिरासे यांनी वारजे पोलीस ठाण्यात धाव घेत आर्त विनवणी केली.

वरिष्ठ पोलीस निरीक्षक विश्वजित काईगंडे आणि गुन्हे निरीक्षक प्रकाश धेंडे यांनी घटनेचे गांभीर्य ओळखले. त्यांनी पोलीस बिट मार्शल शिवाजी भोसले आणि माधव औताडे यांना तातडीने वारजे सर्विस रोड ते नवले ब्रिज परिसरातील सीसीटीव्ही फुटेज तपासण्याचे आदेश दिले. पोलीस अंमलदार नंदकुमार चव्हाण, शिवाजी भोसले आणि माधव औताडे यांनी अथक प्रयत्न करून अवघ्या तीन तासांत अनेक फुटेज तपासले. त्यांनी रिक्षाचा नंबर शोधून 'नाकाबंदी' ॲपच्या मदतीने रिक्षाचालकाचा पत्ता आणि मोबाईल नंबर शोधून काढला. रिक्षाचालकाशी संपर्क साधून त्याला नवले ब्रिजखाली बोलावण्यात आले आणि रिक्षाच्या मागील सीटवर असलेली ती बॅग हर्षा गिरासे यांना सुपूर्द करण्यात आली. बहिणीने विश्वासाने दिलेले दागिने सुखरूप पाहिल्यानंतर हर्षा गिरासे यांनी पोलिसांचे आभार मानले.