Pune: प्रवासी बनून आले आणि पुणे मेट्रोच्या रुळावर टाकल्या उड्या, शरद पवार गटाच्या स्टटंबाज कार्यकर्त्यांचा प्रताप

नरेंद्र पावटेकर असं या स्टंटबाज आंदोलकाचं नाव असल्याचं समोर आलं आहे. मेट्रो रुळावर आंदोलन करून प्रशासनाला वेठीस धरणाऱ्या आंदोलकांची पार्टीतून तात्काळ हकालपट्टी करणार आहे, अशी माहिती शहराध्यक्ष प्रशांत जगताप यांनी दिली.

आज दुपारी पाऊण वाजताच्या सुमारास पुणे मेट्रोच्या पुणे महानगरपालिका मेट्रो स्थानकाच्या रुळांवरती एका राजकीय पक्षाच्या पदाधिकाऱ्यांनी आंदोलन केलं. हे आंदोलनकर्ते २-४ लोकांच्या गटांनी मेट्रो स्थानकात प्रवासी म्हणून आले आणि त्यांनी अचानक मेट्रो रुळांवर उड्या मारल्या. मेट्रोच्या सुरक्षा रक्षकांनी प्रसंगावधान राखत मेट्रो सेवा तत्काळ थांबविली. हे कार्यकर्ते पुणे मेट्रोच्या रूळांवर आणि बाजूच्या कठड्यांवर बसून आंदोलन करत होते. घटनेचे गांभीर्य ओळखून महा मेट्रोचे अधिकारी घटनास्थळी दाखल झाले आणि पोलीस आणि अग्निशामक दलाला ही माहिती देऊन बोलवण्यात आलं. या आंदोलनादरम्यान मेट्रोची सेवा काही काळ बंद करण्यात आली होती. या सर्व आंदोलनकर्त्याना शिवाजीनगर पोलीस ठाण्यात नेण्यात आले आहे. पुणे मेट्रो कडून त्यांच्यावर रीतसर पोलीस तक्रार (FIR) दाखल करण्यात आलेली आहे.

या आंदोलनादरम्यान, पुणे मेट्रोची मार्गिका-1 वरील सेवा पिंपरी चिंचवड स्थानक ते स्वारगेट स्थानक या दरम्यान सुरळीत सुरू होती. तर मार्गिका-२ वरील सेवा रामवाडी ते जिल्हा न्यायालय मेट्रो स्थानक आणि वनाझ स्थानक ते छत्रपती संभाजी उद्यान मेट्रो स्थानक यादरम्यान सुरू होती. दुपारी पाऊण ते पावणे तीन या काळामध्ये पीएमसी मेट्रो स्थानकातील सेवा बंद ठेवण्यात आली होती. दुपारी पावणे तीन नंतर पुणे मेट्रोची सेवा आता पूर्ववत सुरू झाली आहे. सेवा बंद करण्यात आल्यामुळे प्रवाश्यांना झालेल्या असुविधेबद्दल पुणे मेट्रो दिलगिरी व्यक्त करीत आहे.