Ganesh Visarjan 2025 : पुढच्या वर्षी लवकर या...! गणेश विसर्जनासाठी पिंपरीतील घाटांवर वैद्यकीय पथक तैनात

पिंपरी : पिंपरी-चिंचवड महापालिकेने गणेशमूर्ती विसर्जनाच्या निमित्ताने शहरातील प्रमुख घाटांवर वैद्यकीय पथके आणि रुग्णवाहिका तैनात केली आहेत. आरोग्य विभागाच्या देखरेखीखाली या पथकांमध्ये वैद्यकीय अधिकारी, परिचारिका, मदतनीस, रुग्णवाहिका चालक तसेच सफाई कर्मचारी यांचा समावेश आहे. प्रत्येक पथकाला आवश्यक औषधसाठा, वैद्यकीय साहित्य आणि सुसज्ज रुग्णवाहिका उपलब्ध करून देण्यात आली आहे, त्यामुळे कोणत्याही आपत्कालीन परिस्थितीचा त्वरीत मुकाबला करता येईल. या पथकांचे मुख्य समन्वयक म्हणून सहायक आरोग्य वैद्यकीय अधिकारी डॉ. किशोरी नलावडे यांची नियुक्ती करण्यात आली आहे.