Pune : पुणेकरांनो लक्ष द्या! निगडी ते चिंचवड मार्गाचा प्रश्न सुटणार; मेट्रोकडून आली मोठी अपडेट

सध्या पिंपरी ते निगडी मेट्रो विस्तारित मार्गिकेचे काम सुरू आहे. त्यासाठी भक्ती-शक्ती समूहशिल्प चौक ते चिंचवडच्या एम्पायर इस्टेटपर्यंतचा सेवा रस्ता आणि बीआरटी मार्ग महामेट्रोकडे हस्तांतरित केला गेला आहे. हे अंतर साधारण 4.5 किलोमीटर आहे. या रस्त्याची देखभाल आणि दुरुस्तीची जबाबदारी आता महामेट्रोकडे आहे.

सध्या भक्ती-शक्ती समूहशिल्प चौक ते चिंचवड स्टेशनपर्यंत मेट्रोचे काम सुरू आहे. रस्ता खोदणे, खांब उभारणी, व्हायाडक्टचे काम सुरू आहे. विनाअडथळा काम करता यावे म्हणून महामेट्रोने मार्गावर बॅरिकेड लावले आहेत. त्यामुळे सेवा रस्ता खूप अरुंद झाला आहे. पदपथ उखडून रस्ता कामासाठी वापरात आहे.

अरुंद रस्ता, वाहनांची जास्त गर्दी आणि पावसामुळे पडलेले खड्डे यामुळे वाहतूक खूप संथ आहे. सकाळी व संध्याकाळी गर्दीच्या वेळेत वाहनांची रांगा खूप लांब जातात. दहा मिनिटांच्या अंतरासाठी लोकांना अर्धा तास किंवा त्यापेक्षा जास्त वेळ लागतो.

यापूर्वी सामाजिक संघटना, पदाधिकारी, लोकप्रतिनिधी आणि माजी नगरसेवकांनी खड्डेबाबत तक्रारी केल्या, पण योग्य दखल घेतली जात नव्हती. महापालिकेने महामेट्रोला तीन पत्रे पाठवली, तरीही कामाचा परिणाम दिसत नव्हता. आता महामेट्रोने प्रस्ताव दिला आहे की, काही दिवस वाहतूक बंद करून रस्ता पक्का केला जाईल.यामुळे नागरिकांना सुरक्षित आणि सुरळीत वाहतूक सुविधा मिळेल.