पुणे-सोलापूर महामार्गालगत होतं 'पान शॉप'; ते खाण्याचं पान उघडून बघताच पोलीसही हादरले, दोघांना लगेचच अटक

पोलिसांनी मोबाईल टेस्टिंग मशीनच्या सहाय्याने तपास केला असता, या पानांमध्ये अॅम्फेटामाइन, बेंझोडायझेपाइन्स आणि ओपिएट्स सारखे जीवघेणे अंमली पदार्थ मिसळले जात असल्याचे उघड झाले. अवघ्या ३५ रुपयांत मिळणाऱ्या या एका पानाची नशा दारूच्या एका बाटलीइतकी भीषण असल्याचे समोर आले आहे. याप्रकरणी दुकानमालक निशांत काळभोर (१९) आणि कामगार रामजी पटेल (३३) यांना अटक करण्यात आली असून, रोहित जवळकर हा आरोपी अद्याप फरार आहे.

पूर्व हवेली परिसरात अशा प्रकारे २०० हून अधिक ठिकाणी ही 'नशेची दुकाने' सुरू असल्याचा आरोप स्थानिक नागरिकांनी केला आहे. या कारवाईनंतर परिसरात एकच खळबळ उडाली असून, इतर पान विक्रेत्यांचे धाबे दणाणले आहेत. मात्र, या धक्कादायक प्रकरणांमुळे आणि अशा प्रकारे अनेक ठिकाणी विक्री सुरू असल्याचं समोर आल्यानं पालकांची चिंता वाढली आहे.