Bus Accident: लालपरीही सुरक्षित नाही, सहलीच्या आनंदावर पाणी, मंचरजवळ 20 विद्यार्थी पाच शिक्षक जखमी

संगमनेर येथील सह्याद्री ज्युनिअर कॉलेजच्या विद्यार्थ्यांची सहल एस.टी.च्या चार बसमधून कोळग डेअरीसाठी गेली होती. कोळग डेअरीहून परत संगमनेरला जात असताना, पुणे-नाशिक राष्ट्रीय महामार्गावर मंचरजवळच्या एकलहरे येथे अपघात झाला. एकलहरे येथे रस्त्यावर असलेल्या स्पीड ब्रेकरमुळे पहिल्या बसचा स्पीड अचानक कमी झाला. मागे असलेल्या दुसऱ्या एस.टी. बसच्या चालकाच्या हे लक्षात आले नाही आणि त्याने पहिल्या बसला जोरदार धडक दिली.

अपघातात जखमी झालेल्या २० विद्यार्थी आणि ५ शिक्षकांना तात्काळ मंचर येथील खासगी रुग्णालयामध्ये उपचारासाठी दाखल करण्यात आलं. राज्य परिवहन महामंडळाने जखमींना तातडीची मदत म्हणून प्रत्येकी एक हजार रुपये आणि अन्य जखमींना २० हजार रुपये रोख मदत दिली आहे. सर्व जखमी प्रवाशी सुखरूप असल्याची माहिती मंचर आगारप्रमुख बसंत अरगडे यांनी दिली आहे. जखमींना संगमनेर येथे सोडण्यासाठी मंचर आगाराच्या दोन एसटी बसद्वारे व्यवस्था करण्यात आली आहे. या अपघातामुळे पुणे-नाशिक महामार्गावर काही काळ वाहतुकीची कोंडी झाली होती. मात्र स्थानिक आणि पोलिसांनी तात्काळ ही वाहतूक कोंडी सोडवली.