11 महिन्यांच्या बाळाचा मृतदेह बॅगेत भरून विहिरीत फेकला; पुण्यात आईचंच क्रूर कृत्य, त्या एका फोटोमुळे महिन्याभरानं उलगडा, पतीही हादरला

पूजा पवार ही ८ मार्च रोजी आपल्या ११ महिन्यांच्या मुलगा 'यश' याच्यासह घरातून निघून गेली होती. तिचे पती रवींद्र पवार यांनी ती बेपत्ता असल्याची तक्रार पोलिसांत दिली होती. दरम्यान, पूजाने दुसऱ्या एका व्यक्तीशी तिसरे लग्न केले आणि त्या लग्नाचा फोटो इन्स्टाग्रामवर अपलोड केला. हा फोटो पती रवींद्र यांच्या निदर्शनास आल्यानंतर त्यांनी मुलाबद्दल विचारणा केली, पण पूजाने उडवाउडवीची उत्तरे दिली. यामुळे संशय बळावल्याने रवींद्र यांनी ५ एप्रिल रोजी पोलिसांत धाव घेतली.

पोलिसांनी पूजाला ताब्यात घेऊन विचारपूस केली असता, सुरुवातीला तिने मुलाचा अपघातात मृत्यू झाल्याचा बनाव रचला. मात्र, पोलिसांनी कसून तपास केल्यानंतर तिने गुन्ह्याची कबुली दिली. "मुलगा सतत रडतो आणि मला पुढील आयुष्यात लग्न करायचे असल्याने तो अडथळा ठरू शकतो," या विचारातून तिने मुलाचा गळा दाबून खून केला. त्यानंतर पुरावा नष्ट करण्यासाठी मुलाचा मृतदेह एका बॅगेत भरून विहिरीत फेकून दिला.