Pune News: 'खाकी'तील देवदूत; मृत्यूच्या दारात पोहोचलेल्या व्यक्तीला परत आणलं, असं वाचवलं आयुष्य

लोहगाव पोलीस ठाण्याकडून नांदेड सिटी पोलिसांना एका तरुणाच्या आत्महत्येच्या संदर्भात माहिती मिळाली. रमेश (नाव बदललेलं) नावाचा हा तरुण घरगुती त्रासामुळे फाशी घेऊन आत्महत्या करण्याच्या विचारात होता. ही माहिती मिळताच नांदेड सिटी पोलीस ठाण्याचे वरिष्ठ पोलीस निरीक्षक अतुल भोस यांच्या मार्गदर्शनाखाली पोलीस अंमलदार मनोहर खराडे, शुभम चव्हाण आणि होमगार्ड रोहित राऊत यांनी तातडीने सूत्रे हलवली.

पोलिसांनी तातडीनं संबंधित तरुणाचा मोबाईल क्रमांक मिळवून त्याच्याशी संपर्क साधला. मात्र, तो तरुण उडवाउडवीची उत्तरे देऊन पोलिसांची दिशाभूल करत होता. पोलिसांनी हार न मानता तांत्रिक मदतीनं त्याचं 'लोकेशन' ट्रेस केलं. पथक खडकवासला परिसरात पोहोचलं, परंतु तो तरुण तिथून निघून गेला होता. पोलिसांनी तिथे काम करणाऱ्या शेतकऱ्यांकडे चौकशी केली आणि शोधमोहीम तीव्र केली. अखेर, अत्यंत शिताफीने या तरुणाला शोधून पोलिसांनी त्याला आत्महत्येच्या विचारापासून परावृत्त केलं आणि त्याचे प्राण वाचवले.