Porsche अपघात : व्यवस्थेची आरोपीलाच 'मलमपट्टी', बड्या धेंडांचा गुन्हा दडपण्यासाठी केले 5 गुन्हे

बड्या बापजाद्याचा एक अल्पवयीन पोरगा नशेत झिंगत कोटीच्या गाडीनं दोघांना चिरडतो. गुन्हा घडतो. सामान्य घरातल्या दोघांचा तडफडून जीव जातो आणि सुरु होतो आपल्या दिवट्याचा गुन्हा दडपण्यासाठी पैसेवाल्या बापाचा पैशांचा खेळ. गुन्हा गंभीर होता. दोघांचा जीव गेला होता. जीव घेणारा बड्या बापाचा पोरगा होता. व्यवस्थेतल्या भ्रष्ट लोकांना मोठा बकरा सापडला होता. अगदी सुरुवातीपासून व्यवस्था त्या नशेबाज दिवट्याला वाचवण्याच्या कामाला लागली. फिल्डवरील पोलिसांनी प्राथमिक तपासात दिरंगाई केली. अपघाताची माहिती आणि गांभीर्य वरीष्ठांपर्यंत पोहोचून नये ही कामगिरी बजावली. एक अपराध दडपण्यासाठी व्यवस्थेनं पहिला अपराध केला. पण तपासात बिंग फुटलं. पोलिस निरीक्षक राहुल जगदाळे आणि सहाय्यक पोलिस निरीक्षक विश्वनाथ तोडकरी यांना निलंबित करण्यात आलं.

व्यवस्थेचं हे काम नेहमीप्रमाणे सुरु होतं. पण जनतेचा रेटा आणि माध्यमांचा रट्टा असा काही बसलाय की एक अपराध पचवायला निघालेल्या व्यवस्थेनं केलेले सगळेच अपराध जगासमोर आलेत. भ्रष्ट व्यवस्थेचे विद्रूप चेहेरे उघडे पडले. पैशांची मस्ती दाखवणारे तुरुंगात गेलेत. या प्रकरणातून भ्रष्टाचारानं बरबटलेली व्यवस्था पैसेवाले कसे खरीदी करु शकतात हे देशानं पाहिलं आणि व्यवस्थेनं ठरवलं तर पैसेवाल्यांची मस्ती ते कायद्यानं उतरवूही शकतात हेही पाहिलं. तात्कालीक दबावानंतर व्यवस्था न्यायाचं नाटक करेलही पण व्यवस्थेच्या विश्वासार्हतेला लागलेलं नख जास्त घातक आहे. इथं सामान्य माणसाचं काही चालत नाही. पैसेवाल्यांचं इथं काही वाकडं होवू शकत नाही ही धारणा पक्की करणारी ही घटना आहे. ही धारणा बदलायची असेल तर व्यवस्थेला अंतिम न्यायापर्यंत इमान टिकवावं लागेल, पुन्हा कुठलातरी साक्षीदार न्यायाच्या प्रतिक्षेत रवींद्र पाटलांसारखा खंगून मरणार नाही याची काळजी घ्यावी लागेल.