महिलांनो कॅब बुक करताना सावधान; पुण्यातील ही घटना वाचून बसेल धक्का, बाणेरमध्ये भरदिवसा प्रकार

मिळालेल्या माहितीनुसार, पीडित ४२ वर्षीय महिलेने रविवारी (१ फेब्रुवारी) सकाळी आपल्या प्रवासासाठी एका प्रसिद्ध अॅपवरून कार बुक केली होती. प्रवास पूर्ण झाल्यानंतर बाणेर परिसरात कार थांबली असता, भाड्याच्या रकमेवरून चालक आणि महिला यांच्यात किरकोळ वाद झाला. मात्र, या वादाचे रूपांतर अत्यंत खालच्या थरातील कृत्यात झालं.

भाड्यावरून झालेल्या वादानंतर कारचालकाने महिलेशी हुज्जत घालण्यास सुरुवात केली. रागाच्या भरात त्याने महिलेचा विनयभंग करत अश्लील कृत्य केलं. या प्रकारामुळे महिला प्रचंड हादरली. पीडित महिलेनं आरडाओरडा करण्यापूर्वीच आरोपी कारचालक तिथून पसार झाला. या धक्कादायक प्रसंगानंतर महिलेनं तातडीने बाणेर पोलीस ठाणे गाठून आपबिती सांगितली आणि तक्रार दाखल केली.

बाणेर पोलिसांनी या घटनेची गंभीर दखल घेत संबंधित कारचालकाविरोधात विनयभंगाचा गुन्हा दाखल केला आहे. अॅपवरील माहिती आणि कारच्या नंबरवरून चालकाचा शोध घेण्याचे काम युद्धपातळीवर सुरू आहे. पोलीस हवालदार शिरसाठ या प्रकरणाचा अधिक तपास करत आहेत.

कॅब किंवा करामध्ये बसल्यानंतर अॅपमधील 'शेअर राईड' किंवा 'एसओएस' (SOS) बटण वापरावे. गाडीत बसण्यापूर्वी गाडीचा नंबर आणि चालकाचा फोटो अॅपमधील माहितीशी जुळवून पाहावा. तसेच असा कोणताही गैरप्रकार घडल्यास तात्काळ १०० किंवा ११२ नंबरवर पोलिसांशी संपर्क साधावा.