Pune Metro : गणेशोत्सवात भाविकांची मेट्रोकडे धाव; पुण्यात एका दिवसात ‘इतक्या’ लाख लोकांनी केला प्रवास

या वर्षी पहिल्यांदाच जिल्हा न्यायालय ते स्वारगेट मार्गावर मेट्रो सेवा सुरू झाली असून, कसबा, मंडई आणि स्वारगेट या स्थानके थेट मानाच्या गणपती मंडळांजवळ पोहोचतात. त्यामुळे भाविकांना गर्दी टाळून आरामदायक प्रवास करता आला. गणेशोत्सव काळात प्रवाशांची वाढती गर्दी लक्षात घेऊन महामेट्रोने विशेष नियोजन केले आहे. जिल्हा न्यायालय-स्वारगेट दरम्यान गर्दीच्या काळात मेट्रो दर तीन मिनिटांनी धावणार आहे. 30 ऑगस्ट ते 5 सप्टेंबर दरम्यान सेवा सकाळी सहा वाजेपासून पहाटे दोन वाजेपर्यंत सुरू राहणार आहे, तर 6 व 7 सप्टेंबर रोजी सलग 41 तास अखंड सेवा उपलब्ध राहणार आहे.

साधारणपणे, मेट्रोच्या दोन्ही मार्गिकांवर दररोज दोन लाख प्रवासी प्रवास करतात. मात्र, शनिवारी एकाच दिवशी सव्वा दोन लाखाहून अधिक प्रवाशांनी मेट्रो वापरल्यामुळे सर्व प्रवासी संख्येचे मागील विक्रम मोडीत निघाले आहेत, अशी माहिती मेट्रो अधिकाऱ्यांनी दिली.