पुण्यात 2 अल्पवयीन मुलींवर अत्याचार, नराधम घरात घुसला अन्.., धक्कादायक प्रकार उघड

पहिल्या घटनेत एका अल्पवयीन मुलीवर अत्याचार झाल्याची माहिती समोर आली आहे. याप्रकरणी पीडित मुलीच्या आईने चंदननगर पोलीस ठाण्यात धाव घेऊन फिर्याद दाखल केली. पोलिसांनी दिलेल्या माहितीनुसार, बालाजी गुरुनाथ स्वामी (वय २७, राहणार लक्ष्मीनगर, येरवडा) असं अटक करण्यात आलेल्या आरोपीचं नाव आहे.

पीडित मुलगी अल्पवयीन आहे, हे माहीत असूनही आरोपी तिच्यावर वारंवार अत्याचार करत होता. याबाबत जेव्हा पीडितेच्या आईला समजलं. तेव्हा आरोपीनं पीडितेच्या घरात घुसून तिच्या आईला आणि वडिलांना धमकी दिली. तसेच त्याने मुलीला धमकावून तिच्या असहायतेचा फायदा घेतला. पोलिसांनी पोक्सो (POCSO) आणि अन्य कलमान्वये गुन्हा दाखल करून आरोपीला बेड्या ठोकल्या आहेत.

चंदननगर परिसरातच घडलेल्या दुसऱ्या घटनेनं सर्वांचं लक्ष वेधलं आहे. एका २७ वर्षीय तरुणानं अल्पवयीन मुलीवर बलात्कार केला आणि त्यानंतर तिला ब्लॅकमेल करण्यास सुरुवात केली. पीडितेचे काही आक्षेपार्ह फोटो काढून ते सोशल मीडियावर प्रसारित करण्याची धमकी तो वारंवार देत होता. या धमकीला घाबरून पीडिता तणावाखाली होती, मात्र हे प्रकरण समोर येताच पोलिसांनी ऋतिक रावसाहेब लोणके (वय २७) याला अटक केली आहे.

चंदननगर पोलिसांनी या दोन्ही प्रकरणांची गंभीर दखल घेतली आहे. आरोपींनी यापूर्वीही अशा प्रकारचं कृत्य केलं आहे का, किंवा त्यांच्यासोबत इतर कोणाचे लागेबांधे आहेत का, याचा तपास पोलीस करत आहेत. दोन्ही आरोपींची कसून चौकशी सुरू आहे.