Pune Weather: पुणेकरांना 'थर्टी फर्स्ट'ही स्वेटर घालूनच साजरं करावं लागणार? नवीन वर्षाच्या सुरुवातीला कसं असेल हवामान?

पुणे :पुणे शहर आणि राज्याच्या विविध भागांत सध्या जाणवणारा कडाक्याचा गारवा पुढील काही दिवस कायम राहणार आहे. नवीन वर्षाच्या दुसऱ्या आठवड्यात थंडीची तीव्रता अधिक वाढण्याची शक्यता हवामान तज्ज्ञांनी वर्तवली आहे. उत्तरेकडून येणारे शीतलहरींचे वारे आणि आकाश निरभ्र असल्याने वातावरणात कोरडेपणा वाढला आहे. यामुळे राज्याच्या किमान तापमानात मोठी घट पाहायला मिळत आहे. पुणे शहर आणि परिसरात गेल्या काही दिवसांपासून पारा १० अंश सेल्सिअसच्या खाली स्थिरावला आहे. २१ डिसेंबर रोजी हवेली येथे ६.६ अंश सेल्सिअस या यंदाच्या हंगामातील नीचांकी तापमानाची नोंद झाली होती. गुरुवारी देखील शहरात ९.८ अंश सेल्सिअस इतके कमी तापमान नोंदवले गेल्याने पुणेकर हुडहुडी भरवणारा गारवा अनुभवत आहेत.