Pune MHADA : पुणेकर लक्ष द्या! म्हाडाच्या घरांसाठीची सोडत पुन्हा लांबणीवर; नवीन तारीख काय?

पुणे मंडळाच्या घरांसाठी 11 सप्टेंबरपासून ऑनलाइन नोंदणी प्रक्रिया सुरू करण्यात आली होती. या सोडतीअंतर्गत एकूण 4,186 घरे उपलब्ध असून त्यामध्ये सर्वसमावेशक गृहनिर्माण योजनेअंतर्गत 20 टक्के म्हणजेच 3,222 घरे तर एकात्मिक गृहनिर्माण योजनेतील 15 टक्के म्हणजेच 864 घरांचा समावेश आहे.

सोडतपूर्व प्रक्रिया सुरू झाल्यानंतर संगणकीय प्रणालीतील अडचणींमुळे दोन वेळा मुदतवाढ देण्यात आली. सुरुवातीला ही मुदत 21 नोव्हेंबरपर्यंत वाढवण्यात आली होती. त्यानंतर पुन्हा एकदा मुदत वाढवून 11 डिसेंबरपर्यंत करण्यात आली. मात्र त्यानंतरही सोडत होऊ शकली नाही. पुढे 16 किंवा 17 डिसेंबर रोजी सोडत काढण्यात येईल असे सांगण्यात आले होते; मात्र तीही आता होणार नसल्याचे स्पष्ट झाले आहे.

सूत्रांकडून मिळालेल्या माहितीनुसार तब्बल दोन लाख 15 हजार अर्जांची छाननी करून प्रारूप यादी अंतिम करण्यात विलंब झाला. ही प्रक्रिया आता पूर्ण झाली असली तरी प्रारूप यादीवरील हरकती आणि सुनावणीनंतर अंतिम यादी प्रसिद्ध करण्यासाठी वेळ लागणार आहे. त्यामुळेच पुणे म्हाडा मंडळाला सोडत पुढे ढकलावी लागली आहे. सध्या तरी सोडत नेमकी कधी काढली जाणार याबाबत कोणतीही अधिकृत माहिती उपलब्ध नाही.