आयटीयन्ससाठी गूड न्यूज! पुणे-मुंबई प्रवासात एक तास वाचणार, त्या मागणीला अखेर यश

सध्या स्वारगेट, पुणे स्टेशनवरून सुटणाऱ्या शिवनेरी आणि शिवाई बसला वाकड चौकातून शहरात शिरताना आणि बाहेर पडताना दीड ते दोन तासांचा विलंब होतो. हिंजवडीतून थेट बस सुरू झाल्यामुळे प्रवाशांना आता स्वारगेटला जाण्याची गरज उरणार नाही. पर्यायाने, शहरातील अंतर्गत वाहतूक कोंडीचा फटका न बसता बस थेट हायवेला लागेल, ज्यामुळे प्रवासाचा वेळ लक्षणीयरीत्या कमी होईल.

पुणे शहरात प्रवेश करताना आणि बाहेर पडताना होणारा १ ते १.५ तासांचा विलंब पूर्णपणे टळणार आहे.

एसटी प्रशासनाने या सेवेचा प्रस्ताव वरिष्ठ स्तरावर पाठवला असून, लवकरच याला मंजुरी मिळण्याची शक्यता आहे. पुणे विभागाचे नियंत्रक अरुण सिया यांनी सांगितले की, प्रवाशांची मागणी लक्षात घेऊन पुढील काही महिन्यांत ही सेवा सुरू करण्याचे नियोजन आहे. हिंजवडीतून दादर, बोरीवली आणि ठाणे या मार्गावर बस फेऱ्या सुरू होऊ शकतात.