आता 'ती' भरणार PMC चा खजिना, मिळकत करांच्या वसुलीसाठी दामिनी पथक!

आता 7 पथके असून एक पथक प्रमुख आणि 5 महिला यांचा समावेश आहे. तर त्यांच्या मार्फत जवळजवळ दीड कोटी रुपये वसुली करण्यात आली आहे. दामिनी पथक हे सकाळी मुख्य कार्यालयात येऊन त्यांना कुठल्या भागात जायचं हे सांगितलं जातं. तसेच कर आकारणी विभागाच्या इतिहासात पहिल्यांदाच महिलांची टीम तयार करण्यात आली आहे. या सर्व महिला या विभागात काम करत असल्यामुळे त्यांना सर्व नियम अटी माहिती आहेत.

वसुली पथकाच्या मोहिमेचे सर्वच स्तरातून कौतुक होत आहे. महिलांच्या सहभागामुळे करवसुली अधिक प्रभावी होत असून महापालिकेच्या महसुलात वाढ होण्यास हातभार लागत आहे. थकबाकीदारांकडून या उपक्रमाला सकारात्मक प्रतिसाद मिळत असून ते मालमत्ता कर वेळेवर भरण्यास प्राधान्य देत आहेत. अन्यथा त्यांची मालमत्ता जप्त केली जाऊ शकते. महिलांच्या नेतृत्वाखाली हा उपक्रम अधिक प्रभावी ठरत असल्याचे महापालिका कर आकारणी सहायक आयुक्त अस्मिता तांबे यांनी दिली आहे.