Vande Bharat Express : पुणे- नांदेड 5 तास वाचणार, वंदे भारत एक्सप्रेस सुस्साट, कुठे थांबणार अन् तिकीट किती?

नवी वंदे भारत एक्स्प्रेस ही नवी ट्रेन पुणे आणि नांदेड या दोन महत्त्वाच्या शहरांना जोडणार असून मराठवाडा आणि पश्चिम महाराष्ट्र यांमधील प्रवास आणखी जलद आणि सोयीस्कर होणार आहे. रेल्वे सूत्रांच्या माहितीनुसार ही नवी वंदे भारत एक्स्प्रेस डिसेंबर 2025 अखेर किंवा जानेवारी 2026 मध्ये सुरू होण्याची शक्यता आहे.

या ट्रेनचे थांबे नांदेड, लातूर, धाराशिव, कुर्डुवाडी, दौंड आणि पुणे येथे असतील. त्यामुळे मराठवाडा आणि पश्चिम महाराष्ट्रातील अनेक औद्योगिक आणि शैक्षणिक केंद्रांना थेट रेल्वे जोडणी मिळणार आहे. विशेष म्हणजे या मार्गामुळे मध्य रेल्वे आणि दक्षिण मध्य रेल्वे विभागांची जोडणी अधिक मजबूत होणार आहे.

रेल्वे विभागाने प्रकल्पाचे काम अंतिम टप्प्यात आणले असून चाचणी धावांचे वेळापत्रक लवकरच जाहीर होईल. प्राथमिक माहितीनुसार, या ट्रेनच्या एसी चेअर कारच्या तिकिटांची किंमत सुमारे 1500 रुपये ते 1900 रुपयांदरम्यान असू शकते. ट्रेन आठवड्यातून पाच ते सहा वेळा धावेल अशी शक्यता आहे. मात्र, अधिकृत तिकीट दर आणि वेळापत्रक अद्याप जाहीर झालेले नाही. प्रवाशांची मागणी आणि मार्गाची व्यस्तता लक्षात घेऊन अंतिम वेळापत्रक ठरवले जाईल.