Pune New IT Park : हिंजवडीच्या वाहतूक कोंडीचा प्रश्न अखेर सुटणार! पुण्यात या ठिकाणी होणार नवं आयटी पार्क

पुरंदरमध्ये आयटी पार्क उभारण्याचा प्रस्ताव पहिल्यांदा शिवसेनेचे (शिंदे गट) आमदार विजय शिवतारे यांनी तत्कालीन मुख्यमंत्री एकनाथ शिंदे यांच्याकडे मांडला होता. त्यावेळी पुरंदरमध्ये विमानतळ, राष्ट्रीय बाजार आणि रिंग रोडसारख्या मोठ्या प्रकल्पांसोबत आयटी पार्क उभारण्याची मागणी करण्यात आली होती. शिंदे यांनी या मागणीला सकारात्मक प्रतिसाद दिल्याने शिवतारे यांनी विमानतळ प्रकल्पाला पाठिंबा जाहीर केला होता.

दिवे, चांबळी आणि कोडीत या ठिकाणच्या गायरान जमिनीवर आयटी पार्क उभारण्याचा निर्णय सरकारने घेतला आहे. या तीन ठिकाणच्या जमिनी उद्योग विभागाला हस्तांतर करण्याबाबतचा प्रस्ताव पाठविण्याचा आदेश उद्योगमंत्री उदय सामंत यांनी जिल्हा प्रशासनाला दिले आहेत. त्यानुसार कार्यवाही सुरू आहे, असं विजय शिवतारे यांनी म्हटलं आहे.

या प्रस्तावामध्ये सुरुवातीला काही तांत्रिक त्रुटी होत्या, ज्या उद्योग विभागाने निदर्शनास आणल्या होत्या. विशेषतः, पुरंदरमध्ये प्रस्तावित असलेल्या रिंग रोड, विमानतळ आणि लॉजिस्टिक पार्कमुळे पुन्हा वाहतूक कोंडी होणार नाही का, असा प्रश्न उपस्थित करण्यात आला होता. या प्रश्नांवर विचार करून, मूळ प्रस्तावात बदल करण्यात आला आणि दिवे सोबतच चांबळी आणि कोडीत येथील जागेचा समावेश करून, तीन टप्प्यांत आयटी पार्क उभारण्याचा सुधारित प्रस्ताव सादर करण्यात आला आहे.

दरम्यान, या प्रकल्पाला मंजुरी मिळाल्यास, पुणे जिल्ह्यातील आयटी क्षेत्राचा विस्तार होईल आणि हिंजवडीवरील ताण कमी होण्यास मदत होईल. तसेच, पुरंदर तालुक्यात रोजगार निर्मितीलाही चालना मिळेल. या प्रस्तावावर आता जिल्हाधिकारी प्रशासन आणि उद्योग विभाग काय निर्णय घेतात, हे पाहणे महत्त्वाचे ठरणार आहे.