तस्कर सापाशिवाय जन्मली पिले, पुण्यातील सर्पमित्रानं कशी केली किमया? Video
- Published by:News18 Marathi
Last Updated:
दुर्मिळ तस्कर जातीच्या बिगर विषारी सापाच्या अंड्यातून कृत्रिमरित्या 6 पिलांना जन्म दिला.
पुणे, 25 नोव्हेंबर: सापाला शेतकऱ्याचा मित्र म्हटले जाते. तसेच आपल्याकडे सापाची देवता म्हणूप पूजाही होते. याच सापांचे रक्षण करण्याचं काम सर्पमित्र करत असतात. पुण्यातील सर्पमित्र राजू कदम यांनी असंच सापाला जीवदान देताना त्याच्या अंड्यांनाही वाचवलं. विशेष म्हणजे दुर्मिळ बिनविषारी असणाऱ्या तस्कर सापाची अंडीही कदम यांनी वाचवली. विशेष म्हणजे याच अंड्यातून सापाशिवाय कृतिम पद्धतीनं त्यांनी 6 पिलांचा जन्म घडवून आणलाय. ही किमया कशी केली याबाबत कदम यांनीच माहिती दिलीय.
पिंपरी चिंचवड मधील एका भागात सर्पमित्र राजू कदम हे तस्कर जातीचा साप पकडण्यासाठी गेले होते. पोटात अंडी असल्याने सापाची गती मंदावली होती. त्याला पकडण्याच्या नादात लोकांनी त्याला इजा केल्याने त्याने त्या ठिकाणी 8 ते 10 अंडी दिली. तेव्हा कदम यांनी सापाची सुटका करून ती अंडी घरी आणली. त्या अंड्यांना तब्बल 51 दिवस विशिष्ट तापमानात ह्युमीडिटी बॉक्स तयार करून ठेवले.
advertisement
तब्बल 51 दिवस या अंड्यांचं संगोपन करून यातून ही 6 पिल्लं बाहेर निघाली. अविषारी समजल्या जाणाऱ्या व केवळ महाराष्ट्राच्या काही भागातच आढळणाऱ्या तस्कर सापांच्या पिलांना सर्पमित्र राजू कदम यांच्या अथक प्रयत्नाने जीवनदान मिळाले.
कसा असतो तस्कर साप ?
तस्कर हा अतिशय शांत स्वभावाचा साप हाताळायला अतिशय सोपा आहे. तस्करचा मराठीत अर्थ तस्करी अथवा चोरी करणारा असा असतो. याची लांबी साधारणपणे 1 मीटर पर्यंत व जाडी 3 सेमी पर्यंत असते. रंगाने तपकिरी, बदामी, पिवळसर असतो. अंगावर पट्टे असतात. हे पट्टे बुद्धीबळातील पटासारख्या छोट्या काळ्या पांढऱ्या चौकोनांनी भरलेले असतात. मानेवर इंग्रजी व्ही (v) किंवा दोन काळ्या समांतर रेघांची उठून दिसणारी मुद्रा असते. या सापाची मादी अंडी घालते, अशी माहिती सर्पमित्र राजू कदम यांनी दिली.
Location :
Pune,Maharashtra
First Published :
November 25, 2023 3:11 PM IST
