पुणेकरांनो लक्ष द्या! नववर्षाच्या स्वागतासाठी पोलिसांची कडक नियमावली, उल्लंघन केल्यास थेट होणार कारवाई

पुणे : काही दिवसांत नववर्षाला सुरुवात होत असून, त्याच्या स्वागतासाठी जगभरातील नागरिकांमध्ये मोठा उत्साह पाहायला मिळतो. 31 डिसेंबरच्या रात्री शहरातील विविध ठिकाणी नववर्षाच्या स्वागतासाठी कार्यक्रमांचे आयोजन केले जाते. हॉटेल्स, पब, लॉज, फार्महाऊस तसेच खासगी ठिकाणी जल्लोषात नववर्षाचे स्वागत केले जाते. मात्र, काही ठिकाणी नियमांचे उल्लंघन होत असल्याचे चित्र दिसून येते. मद्यप्राशन करून वाहन चालवणे, सार्वजनिक ठिकाणी गोंधळ घालणे, किरकोळ वादातून हाणामारी होणे तसेच कायदा आणि सुव्यवस्थेला धोका निर्माण करणाऱ्या घटना घडतात. या घटनांनाच आळा घालण्यासाठी प्रशासनाकडून मोठ्या प्रमाणात उपाययोजना राबवण्यात येत आहेत.