Pune News : पुण्यात कडाक्याची थंडी, पण शेकोटीला बंदी; महापालिकेनं सांगितलं कारण

उघड्यावर पेटवलेल्या शेकोट्यांमुळे निर्माण होणारा धूर आणि धूळ शहरातील हवा प्रदूषण वाढवते. यामुळे प्रत्येकाला श्वसनसंस्थेशी संबंधित समस्या, सर्दी-खोकला, अस्थमा आणि इतर श्वसनविकार होण्याची शक्यता वाढते. इतकेच नव्हे तर अशा आगीतून मोठ्या दुर्घटनेचा धोका सुद्धा संभवतो. लाकूड किंवा कचऱ्यापासून निर्माण होणारी आग अचानक नियंत्रणाबाहेर जाऊ शकते, ज्यामुळे इमारती, वाहनं आणि नागरिकांना धोका निर्माण होऊ शकतो.

या गंभीर परिस्थितीला लक्षात घेता पुणे महापालिकेने उघड्यावर शेकोट्या पेटवण्याविरोधात कठोर धोरण जाहीर केले आहे. महापालिका आयुक्त नवल किशोर राम यांनी स्पष्ट सांगितले की, थंडीपासून संरक्षण करणे महत्त्वाचे आहे, पण त्यासाठी कोणताही प्रकारचा पर्यावरणीय किंवा अग्निसंरक्षण नियम मोडता येणार नाही. उघड्यावर शेकोट्या पेटवून प्रदूषण निर्माण करणार्‍यांवर दंडात्मक कारवाई केली जाईल. यामध्ये संबंधित परिसरातील नागरिक, व्यावसायिक संस्था आणि गृहनिर्माण संस्थांवर कडक कार्यवाही केली जाईल.

महापालिकेने नागरिकांना पर्यावरणपूरक आणि सुरक्षित उपाय अवलंबण्याचे आवाहन केले आहे. थंडीपासून संरक्षणासाठी इलेक्ट्रिक हीटर, सेंटरल हीटिंग किंवा इतर सुरक्षित पर्याय वापरण्याचे सल्ला देण्यात आला आहे. पुणेकरांनी सुरक्षिततेकडे लक्ष ठेवून शेकोट्या टाळणे आवश्यक आहे, अन्यथा महापालिकेकडून ठोस कारवाई होईल.