200 कारागीर, 111 फूट उंच गाभारा, यंदाचा दगडूशेठ हलवाई गणपतीचा देखावा असणार खास, VIDEO

पुणे : गणपती उत्सव हा आता काही दिवसावर आला आहे. दरवर्षी गणपतींमध्ये मुख्य आकर्षण हे देखावे असतात. त्यात पुण्यातील गणपतींना देखाव्याची मोठी परंपरादेखील आहे. येथील दगडूशेठ गणपतीच्या दर्शनासाठी पुणेकरच नव्हे तर बाहेरील देशातील नागरिकही येत असतात. त्याचप्रमाणे आता गणपतीच्या देखाव्याच काम हे सध्या जोरदार सुरू झाले आहे.

या वर्षी दगडूशेठ गणपतीच्या देखाव्यात म्हणून हा हिमाचल प्रदेश येथील जटोली शिवमंदिर तयार केले जात आहे. तर ते बनवण्याची जोरदार तयारी सुरू असल्याचे पाहायला मिळत आहे. नेमकी याठिकाणी तयारी कशी सुरू आहे, याबाबतचा लोकल18 च्या टीमने घेतलेला हा आढावा.

भारतभरातील विविध मंदिराच्या प्रतिकृती या देखाव्याच्या माध्यमातून सादर केल्या जातात. यावर्षी हिमाचल प्रदेश येथील जटोली शिवमंदिर तयाराचा देखावा तयार केला जात आहे. आता 60 ते 70 टक्के तयारी ही पूर्ण होत आली आहे. पूर्ण देखावा हा दहीहंडीपर्यंत पूर्ण केला जाणार आहे. आशिया खंडातील शंकराचे सर्वात उंच असे हे जटोली शिवमंदिर आहे आणि याची उंची तब्बल 111 फूट इतकी आहे. त्यामुळे याठिकाणी 111 फूट उंचीच्या गाभाऱ्यात रत्नजडीत असे मखर असेल आणि मागील बाजूस संपूर्ण 12 बारा ज्योतिर्लिंगाच्या प्रतिकृती रेखाटल्या जाणार आहेत.