सरकारी शाळेत दिलं जातंय रायफल प्रशिक्षण, पिंपरी चिंचवडमधील अनोखा उपक्रम, काय आहे यामागची संकल्पना?

पुणे : महानगर पालिकेची किंवा शासकीय शाळा म्हटले की पालक दुर्लक्ष करतात, असे काही ठिकाणी दिसून येते. आपला मुलगा इंग्रजी माध्यमातून शिकावा, अशी अनेक पालकांची इच्छा असते. त्याच्या प्रत्येक कलागुणांना वाव मिळेल अशी अपेक्षा ते बाळगून असतात. त्याबाबतचे चित्र आता बदलायला लागले आहे.

पिंपरी- चिंचवड महानगर पालिकेच्या शाळेतही उत्तम दर्जाचे शिक्षण मिळते, हे वारंवार पुढे आले आहे. थेरगाव येथील महानगर पालिकेच्या माध्यमिक विद्यालयाने टाकाऊ वस्तूंपासून रायफल शूटिंगचे प्रशिक्षण केंद्र सुरू केले आहे. मागील 2 वर्षांपासून हे केंद्र सुरू करण्यात आले आहे.

गरीब आणि होतकरू मुलांना रायफल शूटिंगची आवड जोपासणे जवळपास अशक्यच आहे. कारण, महिन्याला खासगी ठिकाणी रायफल शूटिंगचे प्रशिक्षण घ्यायचे असल्यास प्रतिमहिना 5 ते 10 हजार रुपये मोजावे लागतात. हेच लक्षात घेऊन शाळेतच पार्किंगच्या ठिकाणी प्रशस्त असे रायफल शूटिंग प्रशिक्षण केंद्र उभारले आहे. प्रशिक्षक विजय रणझुंजारे यांनी विद्यार्थ्यांना रायफल प्रशिक्षण द्यायला सुरुवात केली आहे.

गरीब आणि होतकरू मुलांना मोफत प्रशिक्षण मिळत असल्याचा आनंद आहे, असे प्रशिक्षक विजय रणझुंजारे यांनी सांगितले. तर पिंपरी-चिंचवड महानगर पालिकेच्या शाळेत रायफल शूटिंगचे प्रशिक्षण केंद्र उभारणारी थेरगाव येथील ही पहिलीच शाळा आहे.