Maghi Ganesh Utsav: आता मुंबईतच होणार इच्छापूर्ती! इथं आहे महाकुंभ मेळ्याची प्रतिकृती!

मुंबई: प्रयागराज येथे सुरू असलेल्या महा कुंभमेळ्याला सर्वच भाविकांना किंबहुना मुंबईकरांना दूरच्या प्रवासामुळे जाता येत नाही. आता मुंबईकर भाविकांना मुंबईतच महाकुंभमेळ्याचा अनुभव घेता येणार आहे. कांदिवलीच्या समता नगर येथील इच्छापूर्ती माघी गणेशोत्सव मंडळाने यंदाच्या वर्षी प्रयागराज येथील काशी विश्वनाथ मंदिराची आणि गंगा घाटाची प्रतिकृती साकारली आहे. त्यामुळे या ठिकाणी भाविकांची मोठी गर्दी होतेय.

कांदिवलीचा इच्छापूर्ती माघी गणेशोत्सव मंडळातील काही सदस्यांनी प्रयागराज येथे जाऊन तेथील गंगा नदीचे पवित्र जल आणले आहे. हे जल प्रसाद म्हणून भाविकांना मोफत वाटप करत आहेत. गणेशोत्सव साजराकरण्या पलीकडे कांदिवलीचा इच्छापूर्ती माघी गणेशोत्सव मंडळ सामाजिक कार्याला हातभार लावत आहे. या ठिकाणी संध्याकाळची आरती आश्रमातील मुलांच्या हाताने घेण्यात येते. तसेच पर्यावरण पूरक उपक्रम साकारतात. मंडळात येणाऱ्या भाविकांना रोपटं भेट देत आहे. या रोपट्याचे संगोपन करून वर्षभरानंतर ते गडकिल्ल्यांच्या पायथ्याशी झाडे लावणार आहेत, अशी माहिती मंडळाच्या सदस्यांनी दिली.