देवी देते दिवसातून 3 रूपात दर्शन; महाराष्ट्रातील हे प्रसिद्ध मंदिर माहितीये का? Video

कोराडी महालक्ष्मी जगदंबा मंदिर हे मध्य भारतातील एक महत्त्वाचे मंदिर आहे. वर्षाकाठी येथे लाखो भाविक येथे येत असतात. मागील शारदीय नवरात्रोत्सव आणि आश्विन नवरात्रोत्सवात 18 लाख 60 हजार भाविकांनी देवीचे दर्शन घेतले आहे. जगदंबा आणि महालक्ष्मी अशी दोन्ही रुपे एकाच देवीमध्ये बघायला मिळतात. देवीच्या मंदिराचा इतिहास शेकडो वर्ष पुरातन असून नवसाला पावणारी देवी म्हणून कोराडी देवी मानली जाते, अशी माहिती राघवेंद्र टोकेकर यांनी दिली.

अध्यात्मिक, पौराणिक आणि ऐतिहासिक महत्त्व लाभलेला या महालक्ष्मी जगदंबा मंदिराचे नुकतेच नूतनीकरण आणि सुशोभिकरणाचे काम पूर्ण झाले. त्यामुळे मंदिराच्या सौंदर्यात अधिक भर पडली आहे. या दरम्यान भक्तांच्या निवासासाठी 165 खोल्यांचे सर्व गोष्टींनी सुसज्ज असे भक्त निवास बांधण्याचे ठरले होते. मात्र मधल्या काळात कोरोना संकट आले आणि या पार्श्वभूमीवर नागरिकांची गरज लक्ष्यात घेता भक्त निवास ऐवजी मल्टी ऑर्गन ट्रान्सप्लांट हॉस्पिटल उभारण्याचा निर्णय महालक्ष्मी जगदंबा कोराडी मंदिर प्रशासनाने घेतला. मध्य भारतातील एक महत्त्वपूर्ण आणि सर्व सुविधांनी सुसज्ज असे हॉस्पिटल लोकांसाठी अतिशय उपयुक्त ठरणार आहे.

मंदिराच्या सौंदर्यकरणाकरिता विशेष लक्ष मंदिर प्रशासनाच्या वतीने देण्यात आले आहे. मंदिरालगत असलेल्या तलावात 151 फूट हनुमान मूर्तीचे कार्य प्रगतीपथावर असून आगामी काळात एक ते दीड वर्षात हे काम पूर्ण होणार आहे. दर्शनासोबतच मनोरंजन आणि पर्यटन सोबतच स्थानिकांच्या रोजगाराला हातभार लागावा यासाठी विशेष प्रयत्न केले जात आहेत, अशी माहिती राघवेंद्र टोकेकर यांनी दिली.