IPL 2025 : केके'हार'... मागच्या वर्षीच्या चॅम्पियन्सचं यंदा लोटांगण, 5 चुकांनी बुडलं शाहरुखच्या टीमचं जहाज
- Published by:Shreyas Deshpande
Last Updated:
आयपीएल 2025 मध्ये केकेआरची निराशाजनक कामगिरी सुरूच आहे. घरच्या मैदानात झालेल्या गुजरातविरुद्धच्या सामन्यात केकेआरचा 39 रननी पराभव झाला आहे.
कोलकाता : आयपीएल 2025 मध्ये केकेआरची निराशाजनक कामगिरी सुरूच आहे. घरच्या मैदानात झालेल्या गुजरातविरुद्धच्या सामन्यात केकेआरचा 39 रननी पराभव झाला आहे. या पराभवासोबतच शाहरुख खानच्या टीमचा प्ले-ऑफला पोहोचण्याचा मार्गही आणखी खडतर झाला आहे. केकेआरला आतापर्यंत 8 पैकी फक्त 3 मॅच जिंकता आल्या आहेत, तर 5 सामन्यांमध्ये त्यांचा पराभव झाला आहे. 6 पॉईंट्ससह केकेआर क्रमवारीमध्ये सातव्या क्रमांकावर आहे. आता प्ले-ऑफला पोहोचण्यासाठी केकेआरला उरलेल्या 6 सामन्यांपैकी 5 मॅच जिंकाव्या लागणार आहेत.
आयपीएल 2024 मध्ये चॅम्पियन झालेली केकेआरची एका वर्षाच्या आत अशी अवस्था व्हायला अनेक कारणं जबाबदार आहेत. यावर्षीच्या खराब कामगिरीला केकेआरला पाच चुका महागात पडल्या आहेत.
श्रेयस अय्यरला सोडलं
केकेआरला मागच्या वर्षी आयपीएल ट्रॉफी जिंकवण्यात श्रेयस अय्यरने मोलाची भूमिका बजावली, पण या मोसमात केकेआरने श्रेयस अय्यरला रिटेन केलं नाही. मागच्या वर्षी आयपीएल ट्रॉफी जिंकवूनही त्याचं श्रेय आपल्याला दिलं गेलं नसल्याची खंत श्रेयस अय्यरने व्यक्त केली होती.
advertisement
गंभीरला पर्याय सापडला नाही
श्रेयस अय्यरसोबतच गौतम गंभीरनेही मागच्या मोसमात केकेआरला ट्रॉफी जिंकवून देण्यात योगदान दिलं होतं, पण गौतम गंभीर टीम इंडियाचा कोच झाल्यामुळे त्याला केकेआरची साथ सोडावी लागली. गंभीरने साथ सोडल्यानंतर केकेआरला प्रशिक्षक म्हणून त्याच्यासारखा पर्याय सापडला नाही.
अजिंक्यवर विश्वास नाही
आयपीएल 2025 मध्ये सुरूवातीला अजिंक्य रहाणेला कोणत्याच टीमने विकत घेतलं नाही. यानंतर शेवटच्या क्षणी केकेआरने रहाणेला त्याच्या बेस प्राईजवर टीममध्ये घेतलं. तसंच त्याला कर्णधारही केलं, पण लिलावात सुरूवातीलाच विकत न घेतलेल्या खेळाडूला केकेआरने टीमचं नेतृत्व दिल्यामुळे आश्चर्य व्यक्त केलं गेलं होतं.
advertisement
चुकीच्या खेळाडूंची निवड
आयपीएल लिलावाआधी केकेआरने रिंकू सिंग, वरुण चक्रवर्ती, आंद्रे रसेल, सुनिल नरेन, हर्षीत राणा आणि रमणदीप सिंग यांना रिटेन केलं, तर लिलावामध्ये व्यंकटेश अय्यरवर तब्बल 23.75 कोटी रुपये खर्च केले, पण यातल्या कोणत्याच खेळाडूला या मोसमात त्यांच्या नावाला साजेशी कामगिरी करता आलेली नाही.
पिचचीही साथ नाही
आयपीएलच्या या मोसमात केकेआरला त्यांच्या घरच्या मैदानातल्या खेळपट्टीची साथ मिळाली नाही. सुरूवातीच्याच सामन्यांनंतर कर्णधार अजिंक्य रहाणेने ईडन गार्डनची खेळपट्टी केकेआरच्या टीमला मदत करणारी असावी, अशी अपेक्षा व्यक्त केली होती. पण ईडन गार्डनच्या क्युरेटरने मात्र याला मीडियासमोर येऊन नकार दिला, त्यामुळे बराच वाद निर्माण झाला होता.
Location :
Kolkata,West Bengal
First Published :
April 21, 2025 11:44 PM IST
मराठी बातम्या/स्पोर्ट्स/
IPL 2025 : केके'हार'... मागच्या वर्षीच्या चॅम्पियन्सचं यंदा लोटांगण, 5 चुकांनी बुडलं शाहरुखच्या टीमचं जहाज
