एक व्ह्यू आल्यावर किती पैसे देते YouTube? कंटेंट क्रिएटर्सने हे जाणून घेणं गरजेचं

एका रिपोर्टनुसार, YouTube ची पे-पर-व्ह्यू सिस्टम निर्मात्यांना पैसे कमवण्यास मदत करते. याचा अर्थ असा नाही की, तुमच्या व्हिडिओला मिळणाऱ्या प्रत्येक व्ह्यूसाठी तुम्हाला पैसे मिळतील. प्रत्यक्षात, YouTube तुमच्या व्हिडिओवर जाहिरात प्ले होणाऱ्या व्ह्यूजच्या संख्येवर आधारित पैसे देते. उदाहरणार्थ, जर तुमच्या व्हिडिओला एक लाख व्ह्यूज असतील पण जाहिराती नसतील, तर तुम्हाला कोणतेही पैसे मिळणार नाहीत. तसंच, जर तुमच्या व्हिडिओला एक लाख व्ह्यूज असतील आणि त्यावर चालणाऱ्या जाहिरातीला 10,000 व्ह्यूज असतील, तर तुम्हाला त्या 10,000 व्ह्यूजसाठी पैसे मिळतील.

तुमच्या व्हिडिओवर अनेक जाहिराती चालू असतील, तर या जाहिरातींना तुमच्या व्हिडिओपेक्षा जास्त व्ह्यूज मिळू शकतात. या परिस्थितीत, तुमच्या व्हिडिओला कमी व्ह्यूज असले तरीही तुम्हाला चांगले उत्पन्न मिळेल. YouTube चे उत्पन्न जाहिरातींमधून येते, म्हणून ते केवळ जाहिरातींवर आधारित निर्मात्यांना पैसे देते.

या प्रश्नाचे कोणतेही सरळ उत्तर नाही. व्ह्यूजवर आधारित कमाई अनेक घटकांवर अवलंबून असते, ज्यामध्ये सबस्क्राइबर्स, व्हिडिओ पोहोच आणि एंगेजमेंट समाविष्ट आहे. तरीही, जर आपण अंदाजे अंदाज लावला तर, एक क्रिएटर प्रति 1000 जाहिरात व्ह्यूजसाठी 5-15 डॉलर (अंदाजे 444 ते 1330 रुपये) कमवू शकतो.