मुंबई-नवी मुंबई आता मिनिटांच्या अंतरावर, मेट्रो 5 आणि 12 चा मेगा विस्तार; पाहा कुठे येणार नवीन स्टेशन?

कल्याण तळोजा मेट्रो 12 , ठाणे भिवंडी कल्याण मेट्रो 5 यांचा विस्तार करण्यात येणार आहे. याबाबत कल्याण लोकसभा मतदारसंघाचे खासदार डॉ. श्रीकांत शिंदे यांची एमएमआरडीए मुख्यालयात एक महत्त्वाची बैठक पार पडली. यावेळी त्यांनी मार्गिका विस्तार प्रस्ताव मांडत याबाबत एमएमआरडीएला आराखडा तयार करण्याच्या सूचना दिल्या. यामुळे आता मेट्रो 12 ही कळवा मुंब्रा येथे जाणार आहे. तर मेट्रो 5 ही बदलापूर पर्यंत आणि दुर्गाडी मार्गे टिटवाळ्यापर्यंत या मार्गिकेचा विस्तार करण्यात येणार आहे. मेट्रो मार्गिकांच्या या विस्तारामुळे जिल्ह्यातील जवळपास सर्वच शहरातून मेट्रो धावणार आहे.

याबाबत एमएमआरडीएकडून आराखडा तयार करण्यात येत आहे. तर मेट्रो 5 ब ही मेट्रो मार्गिका चिखलोली रेल्वे स्थानकापासून थेट बदलापूर पर्यंत नेण्यासाठी आराखडा तयार करण्यात यावा. तर दुर्गाडी येथून थेट टिटवाळा पर्यंत जाण्यासाठी 5 क मेट्रो मार्गिका उभारण्यासाठीही आराखडा तयार करण्यात यावा. अशा सूचना यावेळी खासदार डॉ. शिंदे यांनी दिल्या. या दोन्ही मार्गिका झाल्यास नागरिकांना मोठा दिलासा मिळेल आणि कल्याण पलीकडच्या नागरिकांना ठाणे, नवी मुंबई, मुंबई गाठण्यासाठी विविध मेट्रो मार्गिका उपलब्ध असतील. याबाबत एमएमआरडीए आयुक्तांनी सकारात्मक प्रतिसाद दिला आहे. यामुळे ठाणे जिल्ह्यातील वाहतूक कोंडी आणि प्रवासाबद्दल नागरिकांना दिलासा मिळेल.