अमेरिकेची मजबुरी बनली भारताची ताकद, रशिया करणार मदत, येणार नाही पेट्रोल डिझेलचं संकट

युक्रेन युद्धानंतर अमेरिकेने रशियाच्या तेल व्यापारावर अनेक निर्बंध लादले होते. यामुळे रशियाची अनेक तेलवाहू जहाजे (टँकर्स) समुद्रातच उभी होती. त्यांना ना खरेदीदार मिळत होते, ना विम्याची सुरक्षा. भारताने रशियाकडून तेल खरेदी सुरूच ठेवली होती, पण अमेरिकेच्या नव्या निर्बंधांमुळे भारतीय कंपन्यांनीही काही काळ सावध पवित्रा घेतला होता. मात्र, आता इराण-इस्रायल युद्धामुळे जागतिक बाजारपेठेत तेलाचा तुटवडा निर्माण होऊ नये, म्हणून अमेरिकेने नमती भूमिका घेतली.

रॉयटर्सने दिलेल्या माहितीनुसार, अमेरिकेच्या या ३० दिवसांच्या सवलतीमुळे भारतीय तेल कंपन्यांनी सुटकेचा निश्वास सोडला आहे. इंडियन ऑइल, भारत पेट्रोलियम आणि हिंदुस्थान पेट्रोलियम यांसारख्या सरकारी कंपन्यांनी व्यापाऱ्यांशी चर्चा सुरू केली असून, सुमारे २० दशलक्ष बॅरल रशियन तेल खरेदीची प्रक्रिया वेगवान झाली आहे. विशेष म्हणजे, ज्या कंपन्यांना नोव्हेंबरपासून रशियन तेल मिळालं नव्हतं, त्यांच्यासाठी हा मार्ग आता मोकळा झाला आहे.

अमेरिकेचे राष्ट्राध्यक्ष डोनाल्ड ट्रम्प यांनी यापूर्वी रशियन तेल खरेदीवरून भारताला इशारा दिला होता. मात्र, भारताने नेहमीच स्पष्ट केलं होतं की, आम्ही तेल कोणाकडून खरेदी करायचं, हा आमचा निर्णय आहे. आता इराण युद्धामुळे उद्भवलेल्या परिस्थितीने अमेरिकेलाही भारताच्या या भूमिकेसमोर झुकावं लागलं.