Iran US Conflict: इराणनं सुरक्षा कवच भेदलं? परराष्ट्र मंत्री आणि संरक्षण मंत्र्यांच्या घरावर अज्ञात ड्रोन्सच्या घिरट्या, व्हाईट हाऊसमध्ये खळबळ

अमेरिकेचे परराष्ट्र मंत्री मार्को रूबियो आणि संरक्षण मंत्री पीट हेगसेथ राहात असलेल्या अत्यंत सुरक्षित लष्करी तळावर अज्ञात ड्रोन्स घोंगावताना दिसले आहेत. या घटनेनंतर व्हाईट हाऊसमध्ये तातडीची उच्चस्तरीय बैठक बोलावण्यात आली असून जगभरातील अमेरिकन दूतावासांसाठी 'ग्लोबल सिक्युरिटी अलर्ट' जारी करण्यात आला आहे. इराणच्या ड्रोनने अमेरिकेला हतबल केले आहे. ड्रोन हल्ल्यांनी अमेरिकेचे मोठं नुकसान झालं आहे. अशातच आता महत्त्वाच्या ठिकाणी ड्रोन दिसल्याने अमेरिकेत खळबळ उडाली आहे.

'वॉशिंग्टन पोस्ट'ने दिलेल्या वृत्तानुसार, वॉशिंग्टनमधील फोर्ट लेस्ले जे. मॅकनायर (Fort Lesley J. McNair) या मिलिटरी बेसच्या वर हे संशयास्पद ड्रोन्स दिसले. हे ड्रोन्स नेमके कुठून आले आणि त्यांचा उद्देश काय होता, याचा थांगपत्ता अद्याप अमेरिकन यंत्रणांना लागलेला नाही. खबरदारीचा उपाय म्हणून मॅकडिल एअर फोर्स बेस आणि जॉइंट बेस मॅकगुयर-डिक्स-लेकहर्स्टवर 'सिक्युरिटी स्टेटस चार्ली' लागू करण्यात आला आहे, जो संभाव्य मोठ्या हल्ल्याचा संकेत मानला जातो.

ही घटना अशा वेळी घडली आहे जेव्हा इस्रायल आणि अमेरिकेच्या हल्ल्यात इराणचे अनेक वरिष्ठ नेते मारले गेले आहेत. इराणने वारंवार अमेरिकेला 'भीषण बदल्याची' धमकी दिली आहे. त्यामुळे हे ड्रोन्स इराणने पाठवले असावेत का, असा दाट संशय व्यक्त केला जात आहे. सुरक्षेच्या कारणास्तव रूबियो आणि हेगसेथ यांना सुरक्षित स्थळी हलवण्याचा विचारही प्रशासनाकडून सुरू आहे.

पेंटागनने या संवेदनशील विषयावर अधिक माहिती देण्यास नकार दिला असला तरी, FBI (Federal Bureau of Investigation) या प्रकरणाची सखोल चौकशी करत आहे. अमेरिकेच्या सुरक्षा कवचात झालेल्या या संभाव्य घुसखोरीमुळे संपूर्ण वॉशिंग्टनमध्ये सध्या तणावाचे वातावरण आहे. इराणने आपली संपूर्ण ताकद अमेरिका आणि इस्रायलला नुकसान पोहोचवण्यासाठी लावली असल्याचे चित्र दिसत असून, ही ड्रोन घटना त्याचाच एक भाग असल्याची चर्चा आहे.