Trending:

शेअर बाजार गडगडणार, रुपया कमजोर होणार, ट्रम्पच्या टेरिफने खळबळ, भारताला किती मोठा झटका?

Published by:Akshay Adhav

Last Updated:July 30, 2025 6:36 PM IST

Donald Trump Tariff: डोनाल्ड ट्रम्प यांच्या निर्णयाने भारत अमेरिका यांच्यातील व्यापारावर मोठा परिणाम होणार आहे.

नवी दिल्ली : सत्ताधाऱ्यांकडून भारत अमेरिकेच्या नात्याचे देशात गोडवे गायले जात असताना अमेरिकेचे राष्ट्राध्यक्ष डोनाल्ड ट्रम्प यांनी २५ टक्के आयात कर (टेरिफ) लादल्याने भारताला मोठा झटका बसला आहे. राष्ट्राध्यक्ष डोनाल्ड ट्रम्प यांनी एक्स पोस्ट करून भारतावर २५ टक्के टेरिफ लादत असल्याचे सांगितले आहे. तसेच भारत अजून रशियाकडून शस्त्रास्त्रे घेत असल्याने जाहीर नाराजीही बोलून दाखवली आहे. ट्रम्प यांच्या निर्णयाने भारत अमेरिका यांच्यातील व्यापारावर मोठा परिणाम होणार आहे.

भारत आमचा मित्र देश आहे. परंतु त्यांनी नेहमीच अमेरिकेवर जास्त टेरिफ लावला. तसेच आयात शुल्काशिवाय इतर नियम देखील कडक आणि आम्हाला न आवडणारे आहेत. दुसरीकडे रशिया आणि युक्रेन यांच्यातील युद्ध थांबावे, असे प्रयत्न होत असताना भारत रशियाकडून शस्त्रास्त्रे खरेदी करतो. आम्हाला हे मुळीच आवडलेले नाही. आता भारताला अमेरिकेला २५ टक्के आयात शुल्क द्यावे लागेल, अशी घोषणा करतानाच नवे नियम १ ऑगस्टपासून लागू होतील, असे ट्रम्प यांनी सांगितले.

भारताला किती मोठा झटका?

भारताच्या उत्पादनांसाठी सर्वांत मोठी बाजारपेठ म्हणून अमेरिकेकडे पाहिले जाते. परंतु नव्याने जाहीर केलेल्या आयात शुल्काने भारताच्या टेक्सटाईल अर्थात कापड बाजार, दागदागिन्यांचे क्षेत्र (ज्वेलरी), वाहनांचे सुटे भाग (ऑटो पार्ट्स), औषधनिर्माण (फार्मा) आणि माहिती आणि तंत्रज्ञान अर्थात आयटी क्षेत्राला मोठा दणका बसणार आहे.

आधीच डॉलरच्या तुलनेत रुपया कमजोर होत आहे. ट्रम्प यांच्या आयात कर धोरणाने आता रुपया अधिक कमजोर होऊ शकतो. तसेच सध्याच्या अस्थिरतेच्या परिस्थिती गुंतवणूक करण्यासाठी गुंतवणूकदार तयार नाहीत. ट्रम्प यांच्या निर्णयाने गुंतवणूकदारांच्या मनोबलावर परिणाम होऊन ते गुंतवणूक करण्यास घाबरतील, अशी भीती तज्ज्ञ व्यक्त करीत आहेत. दुसरीकडे ट्रम्प यांच्या निर्णयाचा भारतीय शेअर बाजाराला मोठा दणका बसेल, अशी शक्यता व्यक्त केली जात आहे.

भारत हा सर्वांत जास्त आयात शुल्क लावणारा देश आहे. आता वेळ आली आहे त्यांच्यावरही तसेच कर लादण्याची. सरकारी नियम, परवानग्या तसेच भारताचे आयात शुल्काशिवाय इतर नियम देखील अतिशय कडक असल्याचे ट्रम्प म्हणाले.