US Attack: सर्वात मोठी बातमी, अमेरिकेचा थेट हल्ला, बॉम्बहल्ल्यात जहाज क्षणात आगीचा गोळा बनलं; आतापर्यंत 117 मृत्यू

लष्कराने शेअर केलेल्या व्हिडीओमध्ये ही बोट समुद्रात वेगाने जाताना दिसते आणि काही सेकंदांतच ती भीषण स्फोटात आगगोळ्यात रूपांतरित होते. हल्ल्यानंतर वाचलेल्या व्यक्तीचा शोध घेऊन त्याला सुरक्षित बाहेर काढण्यासाठी सर्च अँड रेस्क्यू ऑपरेशन सुरू करण्यात आले आहे.

हा हल्ला अमेरिकेच्या समुद्री ड्रग तस्करीविरोधी व्यापक मोहिमेचा भाग आहे. या मोहिमेत आतापर्यंत दक्षिण अमेरिकेच्या सागरी हद्दीत किमान 36 हल्ले करण्यात आले असून त्यामध्ये 117 हून अधिक जणांचा मृत्यू झाल्याची नोंद आहे. यातील बहुतांश कारवाया कॅरिबियन समुद्र परिसरात झाल्या आहेत.

डिसेंबर महिन्यातही अमेरिकेने ड्रग तस्करीत गुंतलेल्या पाच बोटींवर कारवाई केली होती. त्या कारवायांमध्ये आठ जणांचा मृत्यू झाला होता, तर अनेकांनी जीव वाचवण्यासाठी समुद्रात उड्या मारल्या होत्या. काही दिवसांनंतर कोस्ट गार्डने शोधमोहीम थांबवली होती.

अमेरिकेचे राष्ट्राध्यक्ष डोनाल्ड ट्रम्प यांनी या हल्ल्यांमुळे समुद्री ड्रग तस्करी मार्गांवर मोठा आघात बसल्याचा दावा केला आहे. पाण्याच्या मार्गाने होणाऱ्या जवळपास 100 टक्के ड्रग तस्करीवर आळा बसवण्यात यश आल्याचे त्यांनी म्हटले आहे. ही कारवाई व्हेनेझुएलाशी संबंधित तेल टँकरांवरील जप्ती आणि ड्रग तस्करी मार्गांवर नजर ठेवण्याच्या प्रयत्नांचा भाग असल्याचेही सांगितले जात आहे.