अमेरिकेची रशियाला धमकी, ट्रम्प म्हणाले- 50 दिवस देतो, थांबला नाही तर विनाश अटळ; जगभरात खळबळ

अमेरिकेच्या मध्यस्थीनंतरही रशिया-युक्रेनमध्ये युद्धविरामासाठी कोणताही यशस्वी तोडगा न निघाल्याने ट्रम्प यांनी नाराजी व्यक्त केली. रविवारी ट्रम्प यांनी रशियन अध्यक्ष व्लादिमीर पुतिनवर “एक सांगतो आणि दुसरं करतो” असा आरोप केला.

पूर्वी पुतिनबाबत सौम्य भूमिका घेणारे ट्रम्प यांनी अलीकडच्या काळात त्यांच्यावर थेट टीका करण्यास सुरुवात केली आहे. त्यांनी पुतिनवर अमेरिका आणि NATOच्या शांतता प्रयत्नांना कायमचा विरोध केल्याचा आरोप केला. दुसरीकडे, युक्रेनचे अध्यक्ष झेलेन्स्की यांच्याशी फेब्रुवारीत झालेल्या वादानंतर ट्रम्प यांचा त्यांच्याबाबतचा सूर सौम्य झाला आहे. वाढत्या रशियन हवाई हल्ल्यांच्या पार्श्वभूमीवर त्यांनी Patriot प्रणाली पाठवण्याचा निर्णय घेतला.

ट्रम्प यांच्या विशेष दूत कीथ केलॉग यांनी सोमवारी कीवमध्ये झेलेन्स्की यांची भेट घेतली. युक्रेनचे अध्यक्ष झेलेन्स्की यांनी याला फलदायी बैठक म्हणून संबोधलं आणि सांगितलं की त्यांनी युक्रेनचे हवाई संरक्षण, संयुक्त संरक्षण उत्पादन व युरोपच्या सहकार्याने शस्त्रसाठ्याबाबत चर्चा केली.

सोमवारी रशियन सैन्याने पूर्व युक्रेनमध्ये दोन गावं ताब्यात घेतल्याचा दावा केला. यापैकी एक गाव डोनेट्स्कमध्ये आणि दुसरं झापोरीझ्झिया प्रदेशात आहे. पूर्व खार्किव आणि सुमी प्रदेशात रशियन हल्ल्यांत तीन नागरिकांचा मृत्यू झाला.