Trending:

'जर असं झालं तर पृथ्वीचा होईल अंत' नासा नव्हे आता ISRO ने दिला इशारा, नेमकं कारण काय?

Published by:sachin Salve
trending desk

Last Updated:July 04, 2024 6:57 PM IST

पृथ्वीच्या सर्वात जवळ असलेला 'एपोफिस' हा सध्याच्या काळातील सर्वात धोकादायक लघुग्रह मानला जातो.

नवी दिल्ली: सैबेरियातील तुंगुस्का या दुर्गम ठिकाणी एका लघुग्रहामुळे 30 जून 1908 रोजी भीषण हवाई स्फोट झाला होता. यामुळे सुमारे 2,200 चौरस किलोमीटर क्षेत्रातील घनदाट जंगल नष्ट झालं होतं आणि 80 दशलक्ष झाडं नष्ट झाली. पृथ्वीच्या सर्वात जवळ असलेला 'एपोफिस' हा सध्याच्या काळातील सर्वात धोकादायक लघुग्रह मानला जातो. 370 मीटर व्यासाचा हा लघुग्रह 13 एप्रिल 2029 आणि 2036 मध्ये आपल्या पृथ्वीजवळून जाणार आहे. अशा प्रकारच्या लघुग्रहाच्या धडकेमुळे डायनासोर नामशेष झाल्याचं गृहीत धरण्यात आलं आहे. पृथ्वीचं लघुग्रहांपासून संरक्षण करण्यासाठी जगभरातील अंतराळ संस्था 'ग्रहांची संरक्षण क्षमता' निर्माण करण्यासाठी प्रयत्न करत आहेत. भारतीय अंतराळ संशोधन संस्था (इस्रो) देखील याबाबत जबाबदारी घेण्यास उत्सुक आहे.

इस्रो प्रमुखांनी दिला मोठा इशारा

इस्रोचे प्रमुख एस. सोमनाथ म्हणाले, "आपलं आयुर्मान 70 ते 80 वर्षे आहे. आपल्याला आपल्या आयुष्यात अशा आपत्ती दिसत नाहीत, म्हणून आपण असं मानतो की अशा बाबी शक्य नाहीत. जगाचा आणि विश्वाचा इतिहास पाहिला तर, ग्रहांच्या जवळ येणारे लघुग्रह आणि त्यांच्या प्रभावाच्या घटना वारंवार घडलेल्या आहेत. मी गुरू ग्रहाला आदळणारे लघुग्रह पाहिले आहेत, मी शूमेकर-लेव्हीला आदळताना पाहिलं आहे. पृथ्वीवर अशी एखादी घटना घडली तर आपण सर्व नामशेष होऊ."

ते पुढे म्हणाले, "या शक्यता सत्यात उतरू शकतात. त्यासाठी आपण स्वतःला तयार करणं गरजेचं आहे. मातेसमान असणाऱ्या पृथ्वीबाबतीत असं घडू नये, अशी आमची इच्छा आहे. येथे माणूस आणि सर्व सजीवांनी वास्तव्य करावं, अशी आमची इच्छा आहे. पण, आपण आपत्तींना थांबवू शकत नाही. आपल्याला पर्याय शोधावा लागेल. यासाठी आमच्याकडे एक मार्ग आहे ज्याद्वारे आम्ही लघुग्रहांना विचलित करू शकतो. आम्ही पृथ्वीच्या जवळ येणारे लघुग्रह शोधून त्यांना विचलित करू शकतो. पण, कधीकधी हे सुद्धा शक्य होणार नाही. त्यामुळे तंत्रज्ञान विकसित करण्याची गरज आहे. अंदाज लावण्याची क्षमता, त्यांना विचलित करण्यासाठी जड प्रॉप्स पाठवण्याची क्षमता, निरीक्षणात सुधारणा आणि प्रोटोकॉलसाठी इतर देशांसोबत एकत्र काम करणं गरजेचं आहे."

आपल्या सूर्यमालेतील बहुतेक लघुग्रह हे गुरू आणि मंगळाच्या कक्षेतील मुख्य लघुग्रहांच्या पट्ट्यात स्थित आहेत आणि ते कधीही पृथ्वीच्या जवळ येत नाहीत. पण, अंतराळात भरकटलेले काही लघुग्रह पृथ्वीच्या दिशेने येण्याची शक्यता कधीही नाकारता येत नाही.