Wedding Ritual Rukhwat : लग्नात आवडीने मांडतात रुखवत, प्रत्येक लग्नात असतो; पण का? अनेकांना माहिती नाही

बैलगाडी, डोली, सप्तपदी, सौभाग्य अलंकार, आईचा निरोप लिहिलेली कार्डशीटस्, तुळशी वृंदावन, सजवाट केलेले कलश, सजवलेली पान-सुपारी, कृष्णाची हंडी, ताटावरील रुमाल, तोरण, विणलेला आरसा, विणलेल्या बाहुल्या, विणलेला गणपती, सजवलेले घर, आईस्क्रीम काड्यांची होडी, रंगीत शेवया, झुंबर, लटकन, डिझायनर तोरण, सनई-चौघडा, नवरा-नवरी,सुपारीचे भटजी, विहिण पंगत, गौरीहार, जातं, पाटा-वरवंटा, उखळ, भातुकली, फुलदाणी, फळे या गोष्टी साधारण कोणत्याही रुखवतामध्ये असतात.

रुखवत हा शब्द रुखसत आणि वतन या दोन शब्दांपासून बनलेला आहे. रूखसत म्हणजे विदाई, निरोप घेणं, दूर जाणं आणि वतन म्हणजे आपला देश किंवा प्रदेश. लग्न झाल्यावर मुलगी आपला प्रदेश सोडून जाते. रुखसतच्या वेळी मुलीला आपल्या वतनातील काही खास गोष्टी तिच्या सोबत दिल्या जात. त्या खास वस्तूंना रुखवत असं म्हणतात.

पूर्वीच्या काळात दळणवळणाची साधनं उपलब्ध नव्हती. त्यामुळे मुलगी लग्न होऊन सासरी गेली की माहेरच्या लोकांशी मुलीचा संपर्क क्वचितच व्हायचा. आपली आठवण मुलीला राहावी या उद्देशानं मुलीच्या मावश्या, आत्या, काकी, बहिणी आणि मैत्रिणी एकत्र बसून काही विशेष वस्तू आपल्या हाताने बनवून देत असत.