कृषी हवामान : अवकाळी गेला आता थंडीचा तडाखा, या जिल्ह्यांत येणार मोठी लाट, रब्बी पिकांचं व्यवस्थापन कसं कराल?

मुंबई : राज्यात गेल्या दोन ते तीन आठवड्यांपासून परतीचा पाऊस आणि अवकाळी पावसाने शेतकऱ्यांना तसेच नागरिकांना त्रास दिला होता. बंगालच्या उपसागरात निर्माण झालेल्या कमी दाबाच्या पट्ट्यामुळे हवामान बदलले आणि विविध भागात वादळी वाऱ्यासह पावसाने हजेरी लावली. मात्र आता हवामान हळूहळू स्थिर होत असून तापमानात घट होण्यास सुरुवात होणार आहे. भारतीय हवामान विभागाच्या (IMD) अंदाजानुसार, ८ नोव्हेंबरपासून मुंबई, ठाणे, रायगड तसेच विदर्भ आणि मराठवाडा या भागांत तापमानात ४ ते ५ अंशांची घसरण होण्याची शक्यता आहे. त्यामुळे राज्यभरात हळूहळू थंडीची चाहूल लागेल.