TRENDING:
या गुन्ह्यामागील सूत्रधार सराफा कारागीर एकनाथ उर्फ नारायण अरुण कपाळे (वय 35) असल्याचे तपासात निष्पन्न झाले आहे. 25 जानेवारी रोजी हा दरोडा घडवून आणण्यात आला. आरोपींनी दागिने घेऊन जाणाऱ्या व्यक्तीवर पाळत ठेवून योग्य क्षण साधत लूट केली. विशेष म्हणजे, पोलिसांचा संशय येऊ नये म्हणून शहराबाहेर गेल्यानंतर आरोपींनी दुचाकी चालक बदलण्यासारख्या क्लुप्त्या वापरल्या होत्या.
advertisement
रंगकाम करताना उडाला आयुष्याचा रंग; पुण्यात कामगाराचा भयानक शेवट, मन सुन्न करणारी घटना
24 जानेवारीच्या रात्री लॉजवर झालेल्या गुप्त बैठकीनंतर तिघे आरोपी तेथेच मुक्कामी थांबले, तर उर्वरित दोघे परिसरात पाळत ठेवत होते. दुसऱ्या दिवशी सकाळी आठ वाजल्यापासून संजय विष्णुदास कांबळे आणि त्याचा साथीदार अमोल गायके यांच्या हालचालींवर लक्ष ठेवून होते. गायके दुचाकीवरून निघताच संजयने तात्काळ नारायण कपाळेला फोन करून इशारा दिला आणि दरोड्याचा कट अमलात आणण्यात आला.
दरम्यान, स्थानिक गुन्हे शाखेने तांत्रिक विश्लेषण, मोबाईल कॉल डिटेल्स आणि तेलगाव ते गढी दरम्यानचे सीसीटीव्ही फुटेज तपासून आरोपींचा माग काढला. एलसीबीची चाहूल लागताच संजय कांबळे पुण्यातील भाड्याच्या खोलीला कुलूप लावून पसार होण्याच्या तयारीत होता. मात्र, अवघ्या काही मिनिटांच्या फरकाने पोलिसांनी त्याला ताब्यात घेतले. त्याचा एक साथीदार मात्र प्रेयसीसोबत पुण्यातून फरार झाला.
या कारवाईत पोलिसांनी 18 तोळे सोने आणि सुमारे 1 किलो चांदी जप्त केली आहे. नारायण कपाळे, कृष्णा निरडे, अभिषेक शिंदे आणि संजय कांबळे या चौघांना अटक करण्यात आली असून पुढील तपास सुरू आहे. ही धडाकेबाज कारवाई पोलिस अधीक्षक नवनीत कांवत आणि अपर पोलिस अधीक्षक सचिन पांडकर यांच्या मार्गदर्शनाखाली एलसीबीच्या पथकाने केली. संपूर्ण दरोड्याचा कट एखाद्या चित्रपटातील कथानकासारखा असल्याची चर्चा आता नागरिकांत होत आहे.