रंगकाम करताना उडाला आयुष्याचा रंग; पुण्यात कामगाराचा भयानक शेवट, मन सुन्न करणारी घटना

अशोक दशरथ डेंगळे (वय ४९, रा. टिळकनगर, कात्रज-कोंढवा रस्ता) असे मृत्युमुखी पडलेल्या कामगाराचे नाव आहे. शुक्रवारी (३० जानेवारी) दुपारी साडेबाराच्या सुमारास अशोक डेंगळे तळजाई परिसरातील गायत्री सोसायटीमध्ये इमारतीला रंग लावण्याचे काम करत होते. उंचावर काम करण्यासाठी त्यांनी लाकडी पाळण्याचा आधार घेतला होता. मात्र, रंगकाम करत असताना अचानक त्यांचा तोल गेला आणि ते थेट जमिनीवर कोसळले.

या भीषण पडझडीत अशोक डेंगळे गंभीर जखमी झाले होते. त्यांना तातडीने जवळच्या रुग्णालयात दाखल करण्यात आले, मात्र डॉक्टरांनी त्यांना उपचारांपूर्वीच मृत घोषित केले. या प्रकरणी अशोक यांचा मुलगा अमर डेंगळे (वय २३) याने सहकारनगर पोलीस ठाण्यात तक्रार दिली आहे. "वडिलांना कामाच्या ठिकाणी हेल्मेट, सुरक्षा पट्टा किंवा इतर कोणतीही सुरक्षा साधने ठेकेदाराने दिली नव्हती, त्यामुळेच त्यांचा बळी गेला," असा आरोप फिर्यादीत करण्यात आला आहे.

घटनेची माहिती मिळताच पोलिसांनी घटनास्थळाचा पंचनामा केला आहे. कामाच्या ठिकाणी सुरक्षा नियमांचे उल्लंघन केल्याप्रप्रकरणी ठेकेदारावर गुन्हा दाखल करण्यात आला असून, गुन्हे शाखेच्या पोलीस निरीक्षक सोनाली मिठारे या प्रकरणाचा अधिक तपास करत आहेत.