TRENDING:
जनाबाई पाटील असं हत्या झालेल्या ८५ वर्षीय महिलेचं नाव आहे. त्या जळगावच्या पाचोरा तालुक्यातील शेवाळे येथे आपल्या मुलासोबत वास्तव्याला होत्या. गुरुवारी रात्री त्यांची लोखंडी रॉडने डोक्यात वार करून निर्घृण हत्या करण्यात आली. मारेकऱ्यांनी त्यांच्या गळ्यातील मंगळसूत्र व कानातील सोन्याच्या बाळ्या असा एकूण तीन तोळे सोन्याचे दागिने ओरबाडून पलायन केले.
मिळालेल्या माहितीनुसार, घटनेच्या दिवशी जनाबाई यांचे पुत्र कृष्णराव पाटील हे वाढदिवसाच्या कार्यक्रमासाठी पाचोऱ्याला गेले होते. ते वाढदिवसाला गेले असता मागे त्यांच्या आईसोबत आक्रीत घडलं. ज्यावेळी ते घरी परतले, तेव्हा त्यांना आई मृतावस्थेत आढळल्या. आईची हत्या झाल्याचं लक्षात येताच त्यांनी घटनेची माहिती पोलिसांना दिली. डॉग स्क्वॉडसह पोलीस घटनास्थळी दाखल झाले.
advertisement
पोलिसांनी श्वानाच्या मदतीने तपास सुरू केला. मात्र श्वान गावातच फिरलं. यामुळे आरोपी मारेकरी गावातीलच असावा, असा पोलिसांचा प्राथमिक अंदाज आहे. पिंपळगाव हरेश्वर पोलीस ठाण्यात खुनाचा गुन्हा दाखल करण्यात आला असून तपास सुरू आहे. या घटनेमुळे शेवाळे गावात भीतीचे वातावरण पसरले आहे. पोलीस मारेकऱ्याचा शोध घेत आहेत. लवकरच आरोपीला अटक करू असं आश्वासन पोलिसांकडून देण्यात आलं आहे.