TRENDING:
विजय पवार आणि प्रशांत खाटोकर असं अटक केलेल्या आरोपींची नावं आहेत. स्थानिक गुन्हे शाखेच्या पथकाने शनिवारी पहाटे बीड तालुक्यातील मांजरसुंभा परिसरातून सापळा रचत त्यांना ताब्यात घेतले. स्थानिक गुन्हे शाखेला सफारी गाडीतून हे दोघे पुढे जात असल्याची गोपनीय माहिती मिळाली होती. या महितीच्या आधारे पोलिसांनी सापळा रचत तत्काळ संबंधित ठिकाणी धाव घेतली. यानंतर दोघांना पहाटेच्या सुमारास अटक केली.
advertisement
प्रा. विजय पवार आणि प्रशांत खाटोकर यांनी क्लासमध्ये शिकणाऱ्या अल्पवयीन विद्यार्थिनीचा छळ केला होता. याप्रकरणी शिवाजीनगर पोलीस ठाण्यात पोस्कोनुसार गुन्हा दाखल आहे. शिक्षणाच्या पवित्र क्षेत्रात असा घृणास्पद प्रकार घडल्याने समाजमन हादरून गेले आहे. दोषी आरोपींवर कठोर कारवाई करा, अशी मागणी करण्यात येत आहे. यासाठी बीडमध्ये शनिवारी आंदोलन देखील करण्यात आलं. यानंतर आता दोघांना अटक केली आहे.
नेमकं प्रकरण काय?
आरोपी विजय पवार आणि प्रशांत खाटोकर हे दोघं बीडमधील प्रसिद्ध उमा किरण शैक्षणिक संकुलात काम करतात. दोघांनी उमा किरण शैक्षणिक संकुलात क्लासेससाठी येणाऱ्या अल्पवयीन मुलीचा लैंगिक छळ केला. मागील दहा महिन्यांपासून आरोपी तिचं शोषण करत होते.
पीडित अल्पवयीन विद्यार्थिनीने दिलेल्या तक्रारीनुसार, तिने एप्रिल 2024 मध्ये उमा किरण कोचिंग क्लासेस येथे नीट चे क्लासेस लावले होते. ती सकाळी 09.00 ते 12.00 पर्यंत क्लासेसच्या अभ्यासिकेत अभ्यास करायची. तर दुपारी २ ते ६ या कालावधीत तिचे लेक्चर्स असायचे. जुलै 2024 पासून प्रशांत खाटोकर याने मुलींचा छळ करायला सुरुवात केली होती. मुलगी दुपारी बारा वाजता अभ्यासिकेतून बाहेर पडल्यानंतर आरोपी खाटोकर अभ्यासिकेच्या खाली जाऊन थांबायचा. माझ्यासोबत चल, गाडीवर बस, मी तुला घरी सोडतो, असं आरोपी शिक्षक म्हणायचा. यासाठी विद्यार्थिनीने त्याला विरोध केल्यानंतर तो तिच्यावर दबाव टाकून बसवून घेऊन जायचा.
कॅबिनमध्ये बोलवून अश्लील स्पर्श करायचा नराधम
दुपारी 02.0 ते दुपारी 06.00 पर्यंत क्लास झाल्यानंतर प्रशांत खाटोकर पीडित मुलीला एकटीला कॅबिनमध्ये बोलवून घ्यायचा. तिथे तो अश्लील स्पर्श करायचा. एवढेच नव्हे तर तो अंगावरील कपडे काढायला लावून, तिचे अश्लील फोटो काढायचा, असा आरोप पीडितेनं तक्रारीत केला आहे. क्लास सुरू असताना कधी कधी तो क्लासरुममध्येही चुकीचा स्पर्श करायचा. तसेच या घटनेची वाच्यता केल्यास किंवा घरी सांगितल्यास तुला जीवे मारून टाकेन, अशी धमकीही खाटोकर द्यायचा, असा आरोप पीडितेनं केला आहे.
ज्याला मदत मागितली, त्यानेही अश्लील वर्तन केलं
या प्रकाराबाबत जेव्हा पीडित मुलीने दुसरा शिक्षक विजय पवार याला सांगितलं. तेव्हा त्यानेही आपल्यासोबत अश्लील वर्तन करायला सुरूवात केली. आम्ही खोटोकर याला मुलींना त्रास देण्यासाठी ठेवलं आहे, असं म्हणत विजय पवारनेही पीडितेशी अश्लील वर्तन करायला सुरुवात केली. कॅबीनमध्ये कुणी नसताना तो अंगाला चुकीचा स्पर्श करायचा. इतर विद्यार्थी दुसऱ्या क्लासला गेले की, तो एकटीला बाजुला बोलवायचा. थांबवून ठेवायचा. यामुळे क्लासमधील सर्व विद्यार्थी माझ्याकडे वाईट नजरेने बघायचे, अशी आपबिती पीडितेनं सांगितलं आहे.
अखेर दोन्ही नराधम शिक्षकांच्या त्रासाला कंटाळून पीडितेनं हा सगळा प्रकार आपल्या वडिलांना सांगितला. यानंतर वडिलांनी शिवाजीनगर पोलीस ठाण्यात धाव घेत तक्रार दाखल केली. तक्रार दाखल केल्यानंतर दोन दिवसांनी दोन्ही आरोपींना अटक करण्यात आली आहे.