TRENDING:
कोन बनेगा करोडपतीच्या गणपती विशेष भागात महाराष्ट्राच्या धाराशिव जिल्ह्यातील 50 वर्षांचे शेतकरी मुकुंद नारायण मोरे हे शोमध्ये सहभागी होणार आहेत. मुकुंद हे अनेक वर्ष शेतकरी म्हणून काम करत आहेत. त्यांना आधुनिक शेती करण्याची इच्छा आहे. हॉटसीटवर बसल्यानंतर मुकुंद यांनी अमिताभ बच्चन यांना एक वस्तू देऊन त्यांचे आभार मानले. त्यांच्या शेतातील उत्पन्नाची पहिली पोटली ते बिग बींना देतात.
advertisement
मुकुंद अमिताभ यांना म्हणतात, आम्ही शेतकरी आहोत आणि आमच्या शेतात आलेलं पहिलं पीक आम्ही देवाला अर्पण करतो आणि तुम्ही आमच्यासाठी देवसमान आहात. यावर भावुक होत अमिताभ बच्चन म्हणतात, किती गोष्टी तुमच्याकडून शिकायला मिळतात. शेतकरी साधा माणूस असतो पण त्याचं हृदय खूप मोठं असतं.
पुढे बोलताना मुकुंद यांनी गायक कुमार सानू त्यांना खूप आवडतात असं सांगतात. त्यांनी सांगितलं, मी शेतात काम करताना कुमार सानू यांची गाणी ऐकतो. कुमार सानू यांच्याविषयी प्रेम पाहून अमिताभ बच्चन कुमार सानू यांना व्हिडीओ कॉल करतात आणि मुकुंद यांना सरप्राइज देतात.
कुमार सानू स्क्रिनवर येताच मुकुंद प्रचंड खूश होतात. कुमार सानू म्हणतात, तुमचं अन्न खाऊन आम्ही जगत आहोत, गाणी गात आहोत. तुम्ही खूप महान काम करत आहात आणि मी खूप भाग्यवान आहे की तुम्ही माझे फॅन आहात. त्यानंतर कुमार सानू मुकुंद यांच्यासाठी सोचेंगे तुम्हे प्यार... हे गाणं देखील गातात.
मुकुंद हे 1,60,000 रुपयांच्या प्रश्नासाठी ऑडियन्स पोलचा उपयोग करतात आणि योग्य उत्तर देतात. त्यानंतर 3,20,000 रुपयांच्या प्रश्नासाठीही लाइफलाइन वापरुन योग्य उत्तर देतात. त्यानंतर बिग बी त्यांना म्हणतात, तुम्ही खूप विद्वान आहात. तुम्ही शेतकरी आहात आणि तुमच्याकडे खूप ज्ञान आहे. तुमची पत्नी देखील तिथे खूप आनंदी आहे.
त्यावर शेतकरी मुकुंद म्हणतात, "मी ही रक्कम माझ्या पत्नीला देईन. तिला पैठणी साडी घेईन. 25 वर्षात मी तिच्यासाठी एकही भेटवस्तू घेतलेली नाही. म्हणून एक साडी गिफ्ट आणि यात्रेला जाण्याचा प्लान केला आहे".