एका डंपरने बालिकेला धडक दिल्यानंतर अपघात झाला होता अशी माहिती समोर येतेय. अपघातात चिमुकलीचा मृत्यू झाल्यानंतर डंपर चालकाने बालिकेच्या आई-वडिलांना हाताशी धरून हे प्रकरण दडपण्याचा प्रयत्न केला. त्यांनी ३ वर्षांच्या चिमुकलीचा मृतदेह चिरेखाणीत दफन केला होता.
मृतदेह चिरेखाणीत लपवल्याची चर्चा परिसरात बुधवारपासून होत होती. पोलिसांना याची माहिती समजताच या प्रकरणाची शहानिशा करण्यासाठी ते चिरेखाणीवर दाखल झाले. आता या प्रकरणी अपघात दडपल्याबद्दल आणि पुरावे नष्ट करण्याचा प्रयत्न केल्याबद्दल पोलिसांनी गुन्हा दाखल केला.
advertisement
चिरेखाणीत ५ ऑगस्टला अपघात झाला होता. चिरेखाणीतच काम करणाऱ्या लहान दाम्पत्याची मुलगी डंपरखाली सापडून मृत्युमुखी पडली होती. हे प्रकरण दडपण्यासाठी चिरेखाण मालक, डंपर चालक यांनी आई-वडिलांशी संगनमत करून तिचा मृतदेह लपवून ठेवला होता.
चिमुकलीचा मृतदेह दफन करत हे प्रकरण दडपलं गेलं. त्यानंतर चिमुकलीच्या आई - वडिलांना त्यांच्या मूळ गावी ओडिशा इथं पाठवण्यात आलं. पण जेव्हा या प्रकाराची दबक्या आवाजात परिसरात चर्चा सुरू झाली तेव्हा सगळा प्रकार उघड झाला. आई-वडिलांना पोलीस स्टेशनला येण्यास सांगण्यात आलंय. आता या प्रकरणाची अधिक चौकशी केली जात आहे.